Этнэ таны

“Эшләгән эшегез күп булды”

Район мәдәният һәм спорт үзәгендә 18 февраль көнне узган район Советы сессиясе эшендә катнашкан ТРның Дәүләт Советы рәисе Фәрит Хәйрулла улы Мөхәммәтшин Әтнә халкының узган елгы эш нәтиҗәләренә уңай бәя биреп, әнә шулай диде.

Сессиянең эшендә ТР Дәүләт Советы рәисе Фәрит Хәйрулла улы Мөхәммәтшин, район Советы депутатлары, оешма һәм хуҗалык җитәкчеләре катнашты. Сессиянең көн тәртибенә бер мәсьәләлә кертелеп, Әтнә районының 2011 елда социаль-икътисадый үсеше һәм 2012 елда бурычлары каралды. Иң элек көн тәртибе буенча Әтнә муниципаль район башлыгы Габделәхәт Гыйлемхан улы Хәкимов чыгыш ясады.

- Район хакимияте эшчәнлегенең төп максаты - төбәгебез халкының, авыл кешесенең тормыш муллыгын үстерү, социаль-көнкүреш шартларын яхшырту, кешенең шәхесе һәрьяклап үсү, барлык ихтыяҗларын канәгатьләндерү өчен тиешле социаль-икътисадый шартлар тудыру, - диде ул. Чыгышында район башлыгы ел дәвамында район күләмендә башкарылган эшләргә, игенчелек һәм терлекчелек тармагына күбрәк басым ясап, беррәттән мәгариф өлкәсендә барган үзгәрешләргә дә киңрәк тукталды.

- Район хакимиятенең игътибар үзәгендә булган төп мәсьәләләрнең берсе - мәгариф өлкәсе. Район бюджетының иң саллы өлеше дә мәгарифкә карый. Ләкин иң мөһиме - яшь буынга төпле белем, тиешле тәрбия бирү хисабына, районыбызның киләчәк көнен, алдагы яшәешен кайгырту, - диде ул.

Район башлыгының чыгышы буенча фикер алышуларда катнашып, район Советы депутаты Айдар Габделбәр улы Шәрипов үзе җитәкләгән "Мәңгәр" хуҗалыгы эшчәнлеге белән таныштырды, хуҗалык, шулай ук авыл җирлеген борчыган мәсьәләләрне күтәреп, аларны хәл итәргә кирәклеген искәртеп узды. Шулай ук Россия Эчке эшләр министрлыгының Биектау бүлеге Әтнә бүлекчәсе җитәкчесе Фәнил Фидаил улы Сәләхов эчке эшләр бүлеге өлкәсендә булган үзгәрешләр белән таныштырып, полиция хезмәткәрләренең узган елгы эшчәнлегенә анализ ясап, бүлектә кыскартулар булып, сафлары аз калса да, бу эшләренә тискәре йогынты ясамавы хакында сөйләде. Эчке эшләр бүлекчәсе хезмәткәрләренең яңа алымнар эзләвен, һәм алар нигезендә уңай нәтиҗәләргә ирешеп булачагын әйтте.

Реклама

Сессия эшендә чыгыш ясаган ТР Дәүләт Советы рәисе Фәрит Хәйрулла улы Мөхәммәтшин районның узган елгы эшчәнлеген уңай бәяләп, Әтнә халкы өчен сөенүен җиткерде. "Бәләкәй" генә район дибез, әмма минем алай дип әйтәсем килми. Халык санына карап, эшләгән эшегез күп булды. 2011 ел сезнең район - аеруча авыл хуҗалыгы өчен нәтиҗәсе яхшы булды. 2010 ел белән чагыштырасым килми. Чөнки авыр, корылык елы булды. Шулай да авырлыкларны җиңеп чыга алдыгыз. Минем борчыган мәсьәләләр күп, шуларның берсе, чиста татар районы буларак, биредә дә халык саны елдан-ел кими. Һичшиксез чарасын күрергә, төрле яктан ярдәм итәргә. татарның телен, гореф-гадәтен саклап калырга кирәк", - диде. Аннары: "Сезнең районга килеп, тырышып татарча сөйләшеп китәбез, чөнки чыгышларны да татарча ясарга кирәк", - дип тә әйтеп куйды.

Сессиянең көн тәртибе буенча карар проекты укылып, эшчәнлекне тагын да яхшыртуга юнәлдерелгән карарлар кабул ителде.

Сессия эшчәнлеген Татарстан Республикасы Гимнын тыңлап башланды һәм тәмамланды.

Нравится
Поделиться:
Реклама
Комментарии (0)
Осталось символов: