Этнэ таны

“Онытылмый,төшкә керә”

Күгебез аяз, көннәребез имин булса, җирдә икмәк тә игелә, нефть тә табыла, җаннарыбыз тыныч, табыннарыбыз мул була. Ә безнең иминлегебезне саклап, Ватаныбыз сагында кыю йөрәкле, лачындай ир-егетләребез тора.

Реклама

Солдат сугышны сайламый һәм аны игълан итми. Солдат халык һәм Туган ил алдындагы бурычын үти. Әфганстан җирендә дә совет солдатлары үзләренең гражданлык бурычын үтәделәр.
Әфганстан...Бу сүз әледә күп кешенең йөрәгендә авыр хисләр тудыра.10 елга якын барган бу сугышта күпме ир-егетнең гәүдәсе цинк табутта кайтмаган, сугыштан кайтканнары да кайберләре физик һәм мораль яктан гарип калганнар.
Сүзем авылдашым Абдуллин Фердинант Зиннур улы турында. Фердинант абый Әтнә районы Түбән Көек авылында колхозчы гаиләсендә туа. Түбән Көек мәктәбенең 8 сыйныфын тәмамлагач, 9-10 ны Олы Әтнә урта мәктәбендә укый. Биредә машина йөртү таныклыгы алып чыга. Аннары туган колхозына кайтып эшкә урнаша. Баштарак төяүче булып эшли. Соңыннан "МТЗ-52" тракторына утыра. Армия сафларына китәр алдыннан кулын сындыра ул. Шулай булса да, колхоздагы эштән калмый, бер генә кул белән булса да тракторында эшли. Гипсны алдыргач, армиягә китәргә повестка килә. 1986 нчы елның 18 октябрендә Армия сафларына алына. Әрмәнстанда биш ай өйрәтүләрдән соң аларны Әфганстанга озаталар. Биредә 1989 елга кадәр хезмәт итә. "БТР да йөрдем. Анда күргәннәрне сөйлисе дә, искә төшерәсе дә килми. 27 ел узса да әле һаман төшләргә керә,- ди ул. Фердинант абый үз тормышыннан канәгать. Армия хезмәтеннән кайткач, туган колхозында кала. "Уңыш" хуҗалыгының алыштыргысыз тракторчысы булып эшли. Гөлназ апай белән бер ул һәм кыз үстерәләр. Бүгенгесе көндә склад мөдире вазифасын башкара. Тыныч тормышта да ул тырышлыгы, фидакарьлеге белән үзенең туган ягына бирелгәнлеген исбатлый. Көн дими, төн дими колхоз эшендә. Алны, ялны белмичә намус белән үз колхозына хезмәт итә.
Мин авылдашым белән горурланам. Киләчәктә аңа тазалык-саулык, гаилә бәхете, тыныч-тигез тормыш теләп калам.
Җир йөзендә сугышлар башка кабатланмасын. Яшь егетләрнең гомере вакытсыз өзелмәсен, ата-аналар кайгы яше түкмәсен иде. Кеше бу дөньяга иҗат итү, җирне матурайту өчен яратылган.Без-тынычлык яклы!

Нравится
Поделиться:
Реклама
Комментарии (0)
Осталось символов: