Әтнә районы урып-җыюны тәмамлады

Тәтеш районында, Идел алды территориясендә генә түгел, тулаем Татарстан буенча да иң югары уңдырышлылык теркәлгән. Биредә аграрийлар гектарыннан уртача 40 центнердан артык икмәк җыя. Урып-җыю кампаниясе барышы турында Хөкүмәт Йортында узган киңәшмәдә республиканың Авыл хуҗалыгы һәм азык-төлек министрлыгы башлыгы Марат Җәббаров җиткерде. Бу хакта Татарстан Республикасы Рәисе матбугат хезмәте хәбәр итә.

Бүгенге көндә төбәктә 1 млн 80 мең гектар, ягъни бөртекле культураларның 72 проценты суктырылган. Әтнә һәм Зәй районнары урып-җыюны тәмамлады, якын арада Кама Тамагы һәм Саба районнары урып-җыюны тәмамларга планлаштыра.

Республикада кыр эшләре дәвам итә, урып-җыю белән беррәттән көзге культуралар чәчү, туфрак эшкәртү һәм терлек азыгы әзерләү бара. Гомумән алганда, республикада 4 мең гектар борчак, 62 мең гектар арпа һәм 17 мең гектар көзге бодай җыеп алынмаган әле.

Марат Җәббаров урып-җыю логистикасын техника тик тормаслык һәм уңай килгән һава шартларыннан файдаланып калырлык итеп төзергә кирәклеген ассызыклады. Киләсе атна уртасыннан республикада явым-төшемнәр фаразлана.

Киңәшмәне Татарстан Республикасы Рәисе Рөстәм Миңнеханов үткәрде. Чарада шулай ук Татарстан Республикасы Премьер-министры Алексей Песошин катнашты.

Татар информ