Ислам буенча никахта мәһәргә нәрсә сорасаң яхшырак?

– Безнең көннәрдә күп кенә гаиләләр һәм яшьләр мәһәр турында берни дә белми, шуңа күрә никахлашуны мәһәрнең санын һәм төрен әйтмичә башкара. Мәһәрне түләү – фард (тиеш), чөнки Аллаһ: «Хатын-кызларга бирнәләрен ихлас күңелдән тапшырыгыз. Әгәр алар үз теләкләре белән аның бер өлешен сезгә бирсә, аны саулыкка һәм яхшылыкка кулланыгыз», – дип боера (Ән-нисә сүрәсе, 4/4). Мәһәр итеп файдаланырга яки сатарга мөмкин булган, тыелмаган теләсә нинди әйбер: мөлкәт, хатын-кыз үз ихтыяҗларына сарыф итәрлек акча, йорт, җир кишәрлеге, автомашина һ.б. бүләк итәргә рөхсәт ителә. Мәһәрне чикләнмәгән күләмдә түләргә мөмкин. Ләкин аның иң аз микъдары – 10 дирһәмгә яки аның эквивалентына тигез. Безнең көннәрдә ул 30 грамм көмеш. Пәйгамбәр (с.г.в.) заманында 10 дирһәмгә ике сарык сатып алырга мөмкин булган. Шуңа күрә, мәһәрне исәп­ләгәндә, иң яхшысы шуннан чыгып эш итү. Шулай ук, мәһәр турында сөйләшкәндә кияүнең финанс хәлен исәпкә алырга кирәк, бу асылда никахлашучыларның тигезлеген билгеләү булып тора.

Яшел Үзән