Читлек интектерде...

Билгесезлек.
Басып торам шом эчендә.
Бушлык.
Серле бар да.
Артык сәер тынлык.
Җил дә исми.
Кошлар карап оча күктән.
Үле авыл?..
Шөбһә тулы күзләр – тәрәзләрдә.
Хәбәр көтә бар да кәрәзләрдән...
... Ә бер нәни бөре
баш калкыткан язны күреп.
Җылы өрмәк була яңа туып.
Ә бит әле кичә генә
дөнья башка иде.
Бар да чыр-чу килеп
эшкә чаба, эштән кайта иде.
Көлә иде күзләр.
Шаян иде сүзләр.
Ә без!.. Ә без һаман
шулай булыр диеп уйлаганбыз.
Шөкер итү түгел,
кадерен дә аның белмәгәнбез.
Эштән арып кайту, аралашу
бәхет икән, ләса.
Бар да өйдә хәзер.
Кырын ята күпләр.
Уңай кебек үзе:
кәрәзләрдә – тормыш,
тәрәзләрдә – күзләр.
Өметсезлек.
Ирек кенә чикле.
Читлек интектерде.
Урам ялгыз бүген!..
Нәни бөре ята кар астында
Кояш көтеп.
Сүрия Мингатина,
16 апрель 2020