175 нче мәктәпнең 9, 11 сыйныфлары башка мәктәпкә күчерелә, калганнар дистанцион укый

Казанның 175 нче мәктәбенең 9 һәм 11 нче сыйныф укучылары башка мәктәпләргә күчереләчәк. Бу турыда «Татар-информ» агентлыгында атыш вакытында зыян күргәннәргә ярдәм итүгә багышланган матбугат конференциясендә билгеле булды.

«Әлеге мәктәпнең 9 һәм 11 нче сыйныф укучылары вакытлыча 171 һәм 174 нче мәктәпләрдә укып торачак. Калган сыйныфларда уку дистанцион форматта булачак. Мәктәпне тиз арада ремонтлап, укыту эшчәнлеген торгызырга тырышачакбыз», — диде Татарстан Республикасы Премьер-министры урынбасары Ләйлә Фазлыева.

Бүген Казандагы барлык мәктәпләрендә дә дәресләре үткәрелми. Балалар бакчалары гадәти режимда эшлиләр.

Чыганак: https://tatar-inform.tatar/news/society/12-05-2021/175-nche-m-kt-pne-9-11-syynyflary-bashka-m-kt-pk-k-cherel-kalgannar-distantsion-ukyy-5822900