Бөгелмәдә яшәүче әби махсус операция зонасындагы хәрбиләргә УАЗ автомобиле җибәрде

Бүген Тая әби ил сакчыларына УАЗ-39094 «Фермер» автомобилен тапшырды. Бу хакта «Бугульминская газета» яза.

Ул бу гамәлен Бөек Ватан сугышында ил азатлыгы өчен көрәшкән солдатларга рәхмәт әйтергә, аларны искә алырга һәм бүген илне саклаучы хәрбиләргә ярдәм итәргә теләве белән аңлатты.

Искәртеп узабыз, Бөгелмә районы халкы махсус операциядә катнашучы хәрбиләргә гуманитар ярдәм җыеп җибәрүдә актив катнаша. Әйтик, «Татар-информ» агентлыгы хәбәр иткәнчә, Бөгелмәдән махсус операция зонасына 1 миллион сумлык ике тоннага якын гуманитар ярдәм озатканнар. Солдатлар җылы киемнәр, азык-төлек, генератор, бензин пычкысы, рация, тимер мич кебек әйберләр алган.

Бөгелмәдә ел башыннан бирле хәрбиләргә гомуми авырлыгы 66,5 тонна тәшкил иткән 27,3 миллион сумлык 22 партия гуманитар ярдәм җибәргәннәр.

Чыганак