Быел 135 югары уку йорты документларны онлайн кабул итәчәк

 Дәүләт хезмәтләре порталында мәктәпне тәмамлаучылар онлайн рәвештә гариза бирә ала торган югары уку йортларының саны 135гә кадәр артачак.

Әлегә кадәр «Югары уку йортына онлайн керү» сервисыннан файдаланучыларга 54 югары уку йорты ачык иде, дип хәбәр итә ТР Мәгариф һәм фән министрлыгының матбугат хезмәте.

Узган ел югары уку йортларына документларны дәүләт хезмәтләре порталы аша бирү мөмкинлегеннән 20 меңнән артык абитуриент файдаланган. Мондый форматта 70 меңгә якын гариза бирелгән.

«Система техник яктан әзер, һәм без суперсервисны барлык дәүләт югары уку йортларына да куллана алабыз. Аннары коммерциялеләрне тоташтырачакбыз», – дип искәртте Россия вице-премьеры Дмитрий Чернышенко.

Быел «Югары уку йортына онлайн керү» суперсервисында өстәмә керү сынауларына язылырга, көндезге-читтән торып уку һәм читтән торып уку формаларына, максатчан кабул итүгә гариза бирергә, шулай ук дәүләт хезмәтләре порталында кулланучының цифрлы профильле аттестаты турында мәгълүмат алырга мөмкин булачак. 

Чыганак: https://tatar-inform.tatar/news/science/01-02-2021/byel-135-yugary-uku-yorty-dokumentlarny-onlayn-kabul-it-ch-k-5803226