Чөгендерле кәбестә салаты

Бу тәмле салатны безнең редакция кызлары ел да әзерләми калмый. Бер тапкыр әзерләп карасагыз, сез дә аны үзегезнең иң яхшы рецептлар исемлегенә кертәчәксез. Ә иң мөһиме – ул тиз әзерләнә, озак саклана. 
 

Кирәк:

• 2 кг кәбестә;
• 1 уртача  кишер;
• 1 уртача алма;
• 1 уртача чөгендер;
• 1 баш сарымсак;
• 6 аш кашыгы шикәр комы;
• 2 аш кашыгы тоз;
• 150 г үсемлек мае;
• 100 г 9 процентлы аш серкәсе;
• берничә борчак кара борыч;
• 1 дәфнә (лавр) яфрагы;
• 1 литр су.

Кәбестәне шакмаклап турарга, башка яшелчәләрне – эре угычтан, сарымсакны вак угычтан уарга һәм барысын да зур табакка салып, катнаштырырга кирәк. 
Кәстрүлгә су, тоз, шикәр, май, серкә һәм тәмләткечләрне салып, кайнап чыкканнан соң 5 минут кайнатабыз һәм кәбестә өстенә коябыз.
Суынганнан соң банкага тутырып, суыткычта саклыйбыз. Банка авызын полиэтилен капкач белән каплыйбыз. 
Салат 8 сәгатьтән соң әзер була.

Сөембикә