Татарстан халкын цифрлы мошенникларның яңа хәйләләре турында кисәттеләр

Бу хакта Казан федераль университетының террорчылык һәм экстремизмны профилактикалау координация үзәгенең мәгълүмати куркынычсызлык буенча белгече Арслан Мингалиев «Татарстан Республикасы» газетасына биргән әңгәмәсендә белдерде.

Белгеч татарстанлыларга социаль челтәрләр белән сак эш итәргә — беренче чиратта үзләренең битләрендә гаилә һәм шәхси тормыш турында мәгълүмат урнаштырмаска киңәш итте. «Мәсәлән, кодлы сүз буларак кулланып булган мәгълүматны: хайваннарның кушаматлары, фамилияләр һәм башкаларны урнаштырмагыз», - дип аңлатты ул.

Whatsapp мессенджерының тыелуы (Россия Федерациясендә экстремистик оешма дип танылган һәм тыелган Meta корпорациясенә карый) мөмкин түгел, бу аның популярлыгы белән бәйле, диде эксперт.

Аның көндәше, Telegram мессенджерына килгәндә, хәзер инде канал һәм чатлардан «билгеле бер программа тәэминаты ярдәмендә яшерен мәгълүматны алу» мөмкин, диде Мингалиев. Бу кушымтада теләсә кайсы чатка керү мөмкинлеге барлыкка килүне ул «вакыт һәм техник камилләшү мәсьәләсе» дип атады.

Мәгълүмати куркынычсызлык өчен көрәшче шулай ук соңгы вакытта еш күзәтелә башлаган теге яки бу җитәкченең ялган аккаунтлары барлыкка килү очраклары турында да сөйләде. Ул җитәкчегә кире шалтыратудан курыкмаска һәм аның белән мессенджерда турыдан-туры әңгәмә алып бару ихтималын бәяләргә, ә андый язышу мөмкинлеге булган очракта «хатка җавап биргәнче» аккаунтларны чагыштырырга киңәш итте.

Мингалиев мошенникларның ялган аудио- һәм видеохатлар ясау өчен нейрочелтәрләр куллануына карата да охшаш киңәш бирде. «<...> нинди генә хәл турында хәбәр итсәләр дә – янгын, су басу, юл-транспорт һәлакәте, һәм сез нинди генә стресста булсагыз да <...> , әңгәмәдәшегез үзен шул кеше дип таныштырган кешегә шалтыратыгыз», - дип ассызыклады ул.

Казан 2024 елның беренче яртыеллыгы нәтиҗәләре буенча Россиянең телефон мошенникларының иң югары активлыгы теркәлгән шәһәрләре исемлегенә керде, дип билгеләп үтә газета. ТР башкаласы Мәскәү, Санкт-Петербург һәм Ставропольдән соң дүртенче урынны яулады.

Татар информ