Телефон караклары пенсионерның 754 мең сум акчасын урлаганнар
Шалтыратучы үзен банк хезмәткәре дип таныштырган.
Телефон караклары Казан пенсионерын алдаган һәм аннан 754 мең сум акча урлаган. Хатын-кыз «Сафиуллина» полиция бүлегенең дежур өлешенә мөрәҗәгать иткән.
Тикшерү барышында ачыкланганча, 2 август көнне пенсионерга билгесез номердан шалтырату килгән. Ят кеше үзен Мәскәүдән банк хезмәткәре дип таныштырган. Ул зыян күрүчегә аның исеменнән билгесез затлар кредит алу өчен гариза тапшырулары һәм Казанның 11 банкы аларны хуплавы турында хәбәр иткән.
Җинаятьче ханымга бу кредитларны рәсмиләштермәсә, аның пенсия картасыннан аларны түләү хисабына акча алыначак, дип белдергән. Аның күрсәтмәсе буенча, хатын мошенник күрсәткән банкларга киткән һәм дүрт займ рәсмиләштергән. Ул 754 мең сум акчаны әйтеп торылган номерларга күчергән. Күпмедер вакыттан соң гына зыян күрүче аны алдауларын аңлаган һәм полициягә мөрәҗәгать иткән.
«Караклык» маддәсе буенча җинаять эше кузгатылган. Хәзер җинаять кылуга катнашы булган затны билгеләү буенча чаралар күрелә, дип хәбәр итә Россия Эчке эшләр министрлыгының Казан буенча идарәсе матбугат хезмәте.
Исегезгә төшерәбез, җинаять корбаны булмас өчен, таныш булмаган затлардан килгән мәгълүматны яңадан тикшерергә кирәк. Бер генә очракта да таныш булмаган кешеләргә үз банк карталары һәм счетларындагы мәгълүматларны хәбәр итәргә, акча күчерергә ярамый.
Алдашу очраклары турында кичекмәстән 02 яки 112 телефоннары буенча хәбәр итәргә кирәк.
Следите за самым важным и интересным в Telegram-каналеТатмедиа
Нет комментариев