Тракторны туктату өчен тәгәрмәченә атканнар

Татарстанның Азнакай районында 48 яшьлек ир-атны «Полиция хезмәткәренә карата көч куллану» маддәсе буенча хөкем итәләр. Бу турыда Тикшерү комитетына сылтама белән «Татар-информ» хәбәр итте.

13 февральдә кич белән бу ир-ат исерек килеш тракторга утыра һәм Октябрь-Бүләк авылы урамыннан йөри. Аны полиция экипажы күреп ала һәм туктатмакчы була, ләкин тракторчы тукталмый.

Полиция хезмәткәрләренең берсе трактор баскычына менә, тракторчы аның күкрәгенә аягы белән тибә, хокук саклаучы җиргә егылып төшә.

Шуннан соң полиция хезмәткәрләре трактор тәгәрмәченә атарга мәҗбүр була. Аннары полиция хезмәткәре тракторның арткы тәрәзәсе аша кабинага керә һәм йөртүчене тоткарлый. Тракторчы полиция хезмәткәренең йөзенә суга.

Тракторчы бөтен гаебен таныган. Тиздән ул суд каршына басачак, диелә хәбәрдә.

Чыганак: https://intertat.tatar/news/incident/02-03-2022/aznakay-rayonynda-traktorny-tuktatu-chen-t-g-rm-chen-atkannar-5850502