Бәйрәмегез котлы булсын, хатын-кызлар!
Табигатьнең язгы үзгәреш кичергән бер мәлендә гүзәл затларыбызның иң күркәм бәйрәмен – 8 Март – Халыкара хатын-кызлар көнен билгеләп үтәбез. Язгы кояш нурына күмелгән әлеге бәйрәмдә мәхәббәт, матурлык, ана назы, ягымлылык, мәрхәмәтлелек, шәфкатьлелек, сабырлык, хатын-кызга ихтирам кебек мәңгелек кыйммәтләр чагылыш таба.
Районыбызның төрле тармакларында эшләүче гүзәл затларыбызны бәйрәм белән котлыйм. Ирешкән уңышларыбыз гаять күләмле, икътисади саннар күркәм. Авыл хуҗалыгында эшләүче хатын-кызларыбыз турында аерым әйтәсе килә. Сер түгел, терлекчелектә, аның никадәр авыр хезмәт булуына карамастан, гүзәл затларыбыз тырышлыгы сокландыра. Басуда иген суккан комбайннарда, ындыр табакларында эшләүче хатын-кызларыбыз булу да куандыра. Бу бәйрәмне хаклы рәвештә горурланып, күтәренке күңел белән каршыларга хакыбыз бар. Гүзәл затларыбыз тырышлыгы белән ирешелгәннәрне тагын да арттыра алырбыз, булганнарыннан да зуррак уңыш үрләрен яуларбыз дип ышанам.
Бу матур бәйрәм көнендә ихлас котлауларымны кабул итегез. Язгы гөрләвекләр сезнең тормышыгызга җылылык, саулык-сәламәтлек, эшегездә уңышлар, күңел тынычлыгы, күтәренке кәеф, бәхет алып килсен!
Габделәхәт Хәкимов, Әтнә районы башлыгы
Следите за самым важным и интересным в Telegram-каналеТатмедиа
Нет комментариев