"Чишмә" - Халыкныкы!

Татарстан Республикасы Мәдәният министрлыгының агымдагы елның  22 нче гыйнварында кул куелган боерыгы нигезендә 

"Фольклор ансамбль" юнәлешендә районыбызның Кышлау авылы мәдәният  йорты каршында 2013 нче елда оештырылган "Чишмә" фольклор ансамбленә (җитәкчесе - Зөлфия Шакирова) "Үзешчән халык коллективы" дигән исем бирелде.

- Безнең бу "Чишмә" ансамбленә ике дистәгә якын  авыл кешесе йөреп  тора, төрле сандагы кеше белән  чыгыш ясарга туры килә, тик уникедән кимемибез. Татар халкының борынгы гореф-гадәтләрен өйрәнеп, аны сәхнәләштерәбез. Гармунга җырлыйбыз. Башка уен кораллары юк. Менә шулай әзерләнеп,  ике тапкыр "Безнең йорт-Татарстан", "Күп аһәңле Татарстан " фестивалендә, "Иске Казан түгәрәк уены"нда катнаштык. Кремль музеенда да чыгыш ясадык... - дип сөйли Зөлфия Шакирова.

    ТР Мәдәният министрлыгыннан килгән белгечләр дә өйрәнә бу ансамбльнең эшчәнлеген. Нәтиҗәсе уңай. Котлыйбыз Сезне, үрләрегез алда булсын, "Чишмә" үзешчән халык коллективы! 

Фотоларны Зөлфия Шакирова җибәрде.