Ташчишмәдә медицина пункты ачылды

Районыбызда республика программасын гамәлгә ашыру кысаларында дүртенче фельдшер- акушерлык пункты ачылды. Алдагылары Ары, Югары Сәрдә, Иске Мәңгәр авылларында ачылган иде. Нәкъ тә шундый модуль-блок тибындагы чәршәмбе көнне ачылгансәламәтлек саклау йортына авыл халкы белән бергәләп мин дә куанып кайттым. Сәламәтлек саклау министрлыгының капитал төзелеш идарәсе башлыгы Фәнис Әфкать улы Исхаков та: "Кешеләре күп, җитештерүчәнлек югары, фельдшеры үз эшенең остасы, кара син бу вакыйганы бәйрәм иткән халыкка, җыйнаулашып килгәннәр, керү юлына келәмгә кадәр җәйгәннәр, ничек боларга яңа бина төземисең",- дип башлады сүзен. - Рәхмәт президентыбызга, сәламәтлек саклауның ни дәрәҗәдә мөһим икәнлеген, авыл җирләрендәге медпунктларны яңартырга кирәклекне аңлады. Республика күләмендә 1790 ФАП бар, алар арасында яңалары да, төзекләндерерү сораганнары да, яңага мохтаҗ булганнары да бар. Биш еллык программа бу, елына 75 пункт ачыла, заманалар үзгәрмичә, финанс белэн тәэмин итеп торсалар, Әтнә районының да тагын берничә авылы ФАПлы булачак әле". Берүк шулай булсын, кирәкле гамәл. Яңа бинаны ачарга килгән Фәрит хәзрәт тә, авыл халкының рәхмәтен җиткергән башлангыч мәктәп укытучысы Сәвия Гайнетдинова да әлеге бинаның ни дәрәҗәдә кирәклегенә басым ясадылар: - Башка авылларда ачылган биналар турында ишетеп, кызыгып йөри идек, үзебездә төзелә башлагач ышанмадык, менә бүген сөенечебезнең чиге юк. Фельдшерыбыз Гөлназ Әхмәтханова исән-сау булып эшләп торсын, ни булса да аңа йөгерәбез, кулыннан килгән кадәр ярдәмен күрсәтә, булдыра алмаса, район больницасына алып китә. Игелекле бина булсын, сезгә дә, район, республика җитәкчеләренә дә рәхмәт,- дип, үзләренең теләкләрен, фикерләрен җиткерделәр. Дога белән башланган эш саваплы. Әлеге бинаны ачар алдыннан Фәрит хәзрәт тә ислам диненең шартларына туры китереп, тиешле догаларны укыды. Баш табиб Азат Гарипов, авыл җирлеге башлыгы Азат Вәлиевнең чыгышыннан соң, хәзрәт белән бу авылда 22 ел фельдшер вазыйфасын башкаручы Гөлназ Әхмәтханова лентаны кисеп, килгән кунакларны, авыл халкын эчкә үткәрделәр. Зур, якты, уңайлы, берничә бүлмәле. -Бар да бар, хәтта "туалеты", җылы суына кадәр бар,- дип куандылар. -Суыкта эшләп бозылмадыгыз, инде менә җылыда эшләп карагыз. Үзең әни дә бул, үзең әби дә бул...- дип, гинекология әбүлмәсенә ишарәләде баш табиб. Исән-сау эшләргә язсын.