Әтнә таңы

Әтнә районы

18+
2024 - Гаилә елы
мәдәният

Эшне тавык чүпләп бетерерлек түгел

27 май көнне район китапханә хезмәткәрләре һөнәри бәйрәмнәрен билгеләп үттеләр.

Бу таҗвирусы дигәннәре бөтен нәрсәнең астын өскә әйләндереп салды да куйды.
Хәзер бер-беребез белән пер­чатка аша гына кү­ре­шәбез, маска аша гына сөйләшәбез. Моннан тыш, күп кенә социаль объектлар ха­лыкка хезмәт итүдән тукта­ды. Адәм баласына рухи азык биргән мәдәният йортла­ры тынып калды. Кем ничек­тер, үзем тере концерт-театрларны сагындым. Таҗ­ви­русы таралуга юл куймас өчен, концерт тамашаларны онлайн режимда карадык, әлбәттә. Тик зур тамаша залла­рында утырып, сәхнәдән тере концерт-театр ка­рауга җитми. Артист халкын да рәхәтләнеп карап, тикшереп булмый бит болай. Ә менә 15 майдан китапханә, музейлар эшли башлавын ишеткәч, район үзәк ки­тапханәсенә юл алдым. 27 май – Бөтенроссия китапханә кө­не булуы да бер сәбәп булды.
Әйе, сагындырган бу йорт. Китап киштәләре, ягымлы йөзләр. Район үзәк ки­тапханәсе директоры Алсу Әс­каровадан ки­тап­ха­нә­ләрнең бүгенге тормышы турында сорашам.
– Районда барлыгы 20 китапханә бар. 18 авыл ки­тапх­анәсе, моннан тыш, район үзәк һәм балалар үзәк китапханәләре. Аларда 31 китапханәче эшли, – дип ачыклык кертте.
– Район буенча 200 меңнән артык китап бар бүгенге көндә. Шунысы куанычлы, китап укымыйлар ди­сә­ләр дә, китапханәнең үз укучыла­ры бар. Яшь­ләр арасында да, урта һәм өлкән буын арасында да, Аллага шөкер. Китапханәгә бик яратып йөрүчеләр бар. Араларында ир-егетләр дә бик күп, – ди Алсу Әскарова.
Бүгенге көндә район китапханәчеләре районның тарихи китабын язу өчен, мәгълүматлар туплау белән шөгыльләнәләр. Авыллар, хуҗалыклар тарихын барлау, бигрәк тә районның кү­ренекле шәхесләрен туп­­лау белән үзәк ки­тап­ханәнең әйдәп баручы ки­тап­ханәчесе Гөлнур Насыйро­ва шөгыльләнә икән.
Гөлнур Насыйрова ки­тап­ха­нә­че булып 1982 елдан бирле эшли. Хезмәт стажы 29 ел. Олы Әтнә урта мәктәбенең 10 сыйныфын тәмамлауга ки­тапханәче булып, район үзәк китапханәсенә эшкә ки­лә.
– Китапханәгә эшкә Наҗия апа Вәлиуллина чакырды мине. Күпләр аны Әс­карова дип тә белә. Бер ел биредә эшләгәннән соң, әлеге һөнәрнең минеке икәнен аңлаганнан соң, Ала­буга мәдәни-агарту учили­ще­сына укырга кердем. Һө­нәр сайлауга Наҗия апа этәр­геч бирде миңа. Читтән то­рып укуы да кыен булмады. Наҗия апа безне эшкә өй­рәт­те. Бер дә тик тотмый иде. “Өйрәнгәнегез үзе­гезгә дия иде”. Ул елларда интернатлар бар иде. Атнаның бер көнендә анда барып, төрле кичәләр үткәрә идек. Аннары укучылары да икенче булган инде аның, – дип искә алды ул еллар­ны Гөлнур апа. Сүзен дә­вам итеп:
– Шуны да әйтәсем килә, күп­ләр безне китап кына биреп утыра дип уйлый. Ә безнең эш­не тавык та чүпләп бе­те­рә торган түгел. Эшли башлаган елларны Әлфинур апа белән дә эшләдек. Ул мәрхүмә инде. Шулай бервакыт урамда коеп яңгыр ява, ул ачуланып килеп керде эшкә. Ни булганы белән кызыксынабыз. Ә ул: “Юлда барганда берәү очрады. Кая барасың, дип сорый. Эшкә, димен. Ә ул миңа: “Әй, мондый яңгырлы көнне нигә барып йөрисең инде анда. Мондый көнне кеше килмидер бит анда”, дип ачуымны чыгарды диде. Һәр һөнәрнең үз нечкәлекләре бар шул, – диде Гөлнур ханым.
Дөрестән дә, замана тех­но­ло­гияләренең алга китеше, әлеге өлкәдә дә чагылыш та­ба. Ә яңалыкны тиз арада өйрәнергә кирәк. Бүгенге көндә китапларга штрих-кодлар урнаштыру да җаваплылык таләп итә.
– Коллективыбыз бик тату безнең. Һәркайсыбыз бер фикердә, бер уйда. Шуңа күрә эшләве дә җиңел, рәхәт,  – ди Гөлнур Насыйрова.
Эче тулы хәзинә, киштәләре саен аң-белем тупланган әлеге йортның ишекләре һәрвакыт ачык булсын, дигән теләктә калам.

Следите за самым важным и интересным в Telegram-каналеТатмедиа


Галерея

Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев