Әтнә таңы

Әтнә районы

18+
2024 - Гаилә елы
Мәгариф

Бар дөньяны балкыткан якты нур

Шиһабетдин Мәрҗанигә Казан артының күгендә аткан йолдыз, Нурын сибә ил өстенә бер туктаусыз. Мәгърифәтнең киң кырына юлым тотсам, Милләтемнең борыңгысын белер булсам, Шиһабетдин йолдызлыгыннан мин эзлим, Күпме белем бирә миңа һәрбер сүзең. Әгәр керсәм мәчетеңә мин Казанда Диварларың ис китәрлек – һаман яңа! Шиһабетдин нуры яктырта аларны, Диварларны гына түгел, бар Казанны. Ауропаның илләре дә сине белгән, Күп җирләрдә китапларың дөнья күргән. Туган ягың – Комыргуҗада бар мәктәбең, Оныкларың белем ала анда бүген. Вилдан Мәхмүт, Олы Мәңгәр авылы

Шиһабетдин Мәрҗани исемендәге республика фәнни- гамәли конференциясе  җиденче тапкыр фән һәм әдәбият сөючеләрне үзенә җыйды. Гадәттәгечә, ул мәшһүр якташыбыз исемен йөрткән Комыргуҗа урта мәктәбендә узды.
Конференцияне оешты­ручылар – Татарстан фән һәм мәгариф министрлыгы, Фәннәр академиясенең Ш.Мәрҗани исемендәге тарих институты, Бөтендөнья татар конгрес­сы, Әтнә районы башкарма комитеты,  район мәгариф бүлеге, Комыргуҗа урта мәктәбе, Шиһабетдин Мәрҗани музее. Быелгы конференция Бөек Җиңүнең 100 еллыгы, ТАССР оешуына – 100 ел һәм Халыкара туган телләр көненә багышлап үткәрелде.
Билгеле булганча, әлеге конференциянең төп мак­саты – укучыларны эз­ләнү эшләренә тарту, укытучыларны фәнни эшчәнлеккә җәлеп итү. Укучыларны күренек­ле галим, мәгърифәтче, тарихчы, фәлсәфәче Шиһабетдин Мәрҗанинең иҗади мирасы белән таныштыру, галимнең күпкырлы иҗади мирасын өйрәнүгә көч керткән галимнәрнең эшчәнлеге белән танышу, шул хезмәтләрне өйрәнү, укучыларда телебезгә, мил­ли гореф-гадәтләребез­гә мәхәббәт тәрбияләү, милләтпәрвәрлек хисен күтәрү, сәләтле балаларны ачыклау – конференцияне оештыручылар үз алдына әнә шундый бурычлар куйды.  
Шунысын да әйтергә кирәк, конференциядә кат­нашу өчен, респуб­ликаның төрле почмак­ларыннан барлыгы 89 эш кабул ителгән. Шулар ара­сында иң-иңнәре сайланып алынып, конфе­ренция барышында 59 укучы чыгыш ясады. Барлыгы алты секциядә эш алып барылды. Алар арасында – “Мәрҗани безнең таңыбызның Чулпаныдыр”, “Бөек Ватан су­гышы сәхифәләре”, “Сол­дат хатлары”, “Бөек Ва­тан сугышында катнашкан якташ хатын- кызлар”, “ТАССРның 100 еллык юбилее”, “Халкым өчен мәңге кирәк Туган телем” кебекләре бар иде. Укытучылар “Белем һәм тәрбия бирү процессында укучыларда милләт­пәрвәрлек хисен тәрбия­ләүгә юнәлдерелгән эш алымнары куллану тәҗрибәсе” секциясендә эш алып барды.
Конференция кунак­лары арасында  район баш­карма комитеты җи­тәкчесе Айрат Каюмов, мә­гариф һәм фән министр­лыгының  милли мәгариф бүлеге әйдәп баручы консультанты Лилия Сәхбиева, Казанның “Апанай” мәчете имам- хатыйбы Нияз хәзрәт Сабиров, Галимҗан Ибраһимов исемендәге Тел, әдәбият һәм сәнгать институтының фәнни хезмәткәре, фи­лология фәннәре кандидаты, доцент Рифат Мир­хәев, якташыбыз Аль­берт Шакиров, Габдул­лаҗан Нигъмәтҗанов, Фән­нәр академиясенең Ш.Мәрҗани исемендәге та­рих инс­титуты хезмәткәр­ләре, Татар конгрессы вәкилләре һәм башкалар белән беррәттән   галимнең үз туганнары да бар иде.
Габдулла Тукай исе­мендә­ге Әтнә татар дәү­ләт драма театры артист­ларының чыгышы ачылыш тантанасына үзе­нә бер ямь бирде. Алар бөек галимне һәм аның шәкертләрен гәүдәләндереп, мәгърифәтченең замандашлары арасында ни дәрәҗәдә олы ихтирамга лаек булуын тагын бер кат дәлилләделәр.
Оештыручыларның  рес­публикакүләм чарага җитди әзерлек белән ки­лүләре күз алдында иде. Ишек төбеннән үк кунак­ларны, катнашучыларны милли киемнән укучылар каршы алды, озатып йөрде. Район мәгариф бүлеге белгечләре һәр кунакны тер­кәп барды. Конференция уңаеннан мәктәптә төрле күргәзмәләр дә оештырылган иде. Район үзәк китапханәсе хезмәткәрләре килгән кунакларга  районыбызның шигырь язучыларының иҗат җимешләре тупланган “Күңел чыңы” китабын һәм олы юбилейларга махсус багышлап эшләнелгән истәлек магнитлар тәкъдим иттеләр. Респуб­ликаның Мөслим, Ютазы кебек ерак районнарыннан килгән, шулай ук күрше Арча, Биектау, Саба районы, Казан шәһәре мәк­тәпләреннән килүче­ләр мәктәптә урнашкан Шиһабетдин Мәрҗани му­зеенда булып, андагы экспонатлар белән дә таныштылар.
Конференция – укучылар өчен дә, укытучылар өчен дә үзенә күрә бер аралашу чарасы да булып тора. Бүген биредә галимнең иҗаты, хезмәтләре белән генә түгел, гомумән, илебез, респуб­ликабыз тарихы белән ныклап кызыксынучы яшьләр җыелган. Эзләнү нәтиҗәсендә күпме яңалык, күпме кызыклы факт­лар белән очрашалар бит алар. Тәҗрибә күрсәткәнчә, алдагы елларда биредә уңышлы чыгыш ясап, мактауга лаек булган укучылар югалып калмадылар, киләчәкләрен фәнни хезмәт белән бәйләделәр. Безнең максатларыбызның берсе – нәкъ менә шул, – ди конференция эшендә күп еллардан бирле оештыру эшләрнен алып барган Мәктәптән тыш эшләр үзәге белгече Райлә Фәхретдинова.
Һәр секция  юнәлешендә чыгыш ясаучылар арасында өч урын билгеләнде. Моннан тыш тагын икешәр  укучыга Ш. Мәрҗани исемендәге тарих интститутының һәм татар конгрессының махсус дипломнары тапшырылды.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев