Әтнә таңы

Максат – патриотик тәрбия

Татар теленең аңлатмалы сүзлегендә: “Патриотизм – ул үз илеңне, халкыңны өзелеп ярату һәм үз Ватаның өчен армый-талмый көрәшергә әзер тору” – дигән аңлатма бирелә.

Гөлназ Сабирова, Күңгәр урта мәктәбенең тәрбия эшләре буенча директор урынбасары
Яшьләрне патриотик рухта тәрбияләүдә төп рольне мәктәп үти, укучыга рухи тәрбияне дә күбесенчә укытучы бирә. Укытучы белем бирүче генә түгел, ул – буыннарны тоташтыру­чы, укучыларга өлкән буыннарның рухи байлыгын җиткерүче дә, шәхес тәрбияләүче дә. Ә шәхес – җәмгыятебезнең җимеше. Җимешне өлгертер өчен шактый  вакыт һәм көч кирәк.
Патроиотик тәрбия би­рү юллары да күп төрле. Мәк­тәптә традицион узды­рылып килүче тәрбияви  чараларның  берсе – патриотик җырлар өйрәнү. Ул, гадәттә, “Аҗаган” уены кысаларында, яшелләр һәм кызыллар командалары арасында  стройда җырлау конкур­сы буларак уздырыла иде. Быелгы уку елында без бу чараны, ТАССРның 100, Бөек Җиңүнең 75, Әтнә районы оешуның  30 еллык юбилейларына багышлап, барлык сыйныф укучылары катнашында оештырырга бул­дык. Чарага әзерлек барышында һәр сыйныф­та патриотизм төшенчәсен ачыклау, чын патриотлык үрнәге күрсәткән як­ташларыбыз, үрнәк шә­хесләребез һәм төбәге­безнең күренекле урыннары белән танышу максатыннан тәрбия сәгатьләре уздырылды. Һәр сыйныф туган якны, Ватанны ярату һәм илне саклау, тынычлык темаларына җыр сайлады. Җырларның килеп чыгу тарихы, авторлары, башкаручыларны өйрәнү өчен укучылар эзләнү эшләре алып бардылар, күп төрле материал белән таныштылар һәм кичә барышында калган сыйныф укучыларына да тәкъдим иттеләр. Кичәдә  данлыклы «Священная война» җыры белән беррәттән кинофильмнар өчен язылган “Пилоты”, “Ты ждешь, Лизавета”, кече яшьтәге балалар өчен язылган “Солдат булам”, “Бравые солдаты” ке­бек җырлар да яңгыра­ды. Заманча җырлардан “Солдатлар” җырын тәкъдим иттеләр. “Һәрвакыт булсын кояш”, “Тынычлык җыры”, “Булмасын сугыш”, “Һәйкәлләргә чә­чәк куябыз”, “Мин яратам сине, Татарстан” җыр­лары да зур патриот­лык хисе белән башкарылды. Видеоязмалар, фотоистәлекләр белән үре­леп барган  музыкаль кичә сизелми дә үтеп китте. Бүгенге көндә безнең алда торган мөһим бу­рычларның берсе – туган җирен, хал­кын, Ватанын сөюче, шуларны якларга әзер булган кеше тәрбияләүдә бу чараның да әһәмияте зур, дип уйлыйм.

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: