Район башлыгы Габделәхәт Хәкимов хуҗалык җитәкчеләре һәм авыл җирлеге башлыклары катнашында терлекчелеккә багышланган җыелыш уздырды.
"Терлек азыгында энергия алмашы 10 М/Дж чамасы булырга тиеш". - Казанда үткән махсус укуларда чит ил белгече әнә шулай дигән. Бу хакта районның авыл хуҗалыгы һәм азык-төлек идарәсе җитәкчесе Хәмит Галимҗанов белдерде. Ә бездә силос 10,8 М/Дж булса да, сенажныкы 8 М/Дж генә. Ни өчен аз? Идарә җитәкчесе фикеренчә, терлек азыгын "картайгач" кына җыеп алабыз.
- Аннан соң, бозауны сыер астына тыгып, аның күпме сөт эчкәнен белеп булмый. Бозау дөньяга килгәннең беренче сәгатьләрендә олырак сыерның сөтен савып эчертү кирәк, - дигән фикердә ул.
"Ветстанция" җитәкчесе Марсель Гарипов та махсус укуларда катнашкан. Анда да чит ил белгече: "22 айлык терлектән бозау алу - отышлы, ә инде 28 ай тирәсенә калса, икътисадый яктан зыянлы вариант", - дигән. Ә бозауга сөт эчертүгә килсәк, билгеле бер вакыттан соң "ЗЦМ"га, ягъни, сөт алыштыргыч матдәгә күчүне өнәмәгән. Хәтта бракка чыгарылган сөт эчертү дә яхшырак санала икән. Район башлыгы исә, тана бозауларга дигән сөтне, үгез бозаулар исәбен киметеп тә бирергә мөмкинлеген искәртте. "Гомумән, тана бозауларны аерым җыю кирәк", - дип саный. Монда шуңа игътибар итү мөһим - чит ил белгечләре фикеренчә, терлекне каплатканнан соң интенсив ашатырга кирәк икән.
Ветстанция җитәкчесе санитар икеайлык кысаларында хуҗалык территорияләрен терлек калдыклары һәм төрле үләксәләрдән чистартырга чакырды. Тагын бер проблема - үләксә базларын, билгеләнгән финанслар нигезендә, тиешле дәрәҗәгә җиткерү бурычы тора. Моңа Габделәхәт Хәкимов та басым ясады:
- Хәзер штрафлар бик зур: контроль органнары эшләүчеләрдән күбрәк, - диде.
Һәркем аңларлык аксиома: сөтнең сыйфаты терлек азыгына бәйле. Бу уңайдан катнашучылар махсус видеофильм карадылар. Чапкыч, "Ворошилка", "Плющилка" һәм аларны дөрес куллану турында сүз барды.
