Акчага һич тынгы юк - "Ватаным Татарстан" газетасы

Акчаң булса да кыен, булмаса да.

(Казан, 19 август, "Татар-информ", "Ватаным Татарстан", Эльвира Вәлиева). "Ак Барс" банкы ябыла! Бу көннәрдә кесә телефоны кабат әнә шундый эчтәлектәге смс-хәбәрләр белән тулды. Кредит оешмасы җитәк­челегенә рәсми рәвештә мәгълүмати һөҗүмне кире кагарга туры килде хәтта. Әйтүләренә караганда, борчылырга сәбәп юк, дип яза "Ватаны Татарстан" газетасы хәбәрчесе.

"Акчаң булса да кыен, булмаса да. "Ак Барс" банкы ябылу турындагы смс-хәбәрдән соң хисап счетындагы барлы-юклы акчамны салдырырга дип банкомат эзләп аңым чыкты. Йә чират, йә банкомат эшләми", - дип язган социаль челтәрләрнең берсендә үзен Илһам дип таныштырган ир-ат. Бу көннәрдә хисап счетындагы акчасы өчен борчылучылар кабат күбәйде. Сәбәбе әлеге дә баягы кесә телефонына килүче шикле смс-хәбәрләргә бәйле. Кредит оешмасының лицензиясен алалар, дип куркыталар. "Ак Барс" банк җитәкчелеге моны мәгълүмати һөҗүм дип атады һәм борчылмаска киңәш итте.

Реклама

"Барлык офисларда да клиентларга хезмәт күрсәтү гадәти тәртиптә башкарыла. Банкоматлар акча белән тиешле дәрәҗәдә тәэмин ителгән, аларның эшендә хилафлык юк", - диелгән кредит оешмасы сайтындагы хәбәрдә. Банкның матбугат хезмәте әй­түен­чә, халык арасында ялган мәгълүмат таралу аркасында, рәсми рәвештә аңлатма бирергә мәҗбүр булганнар. "Банкның ышанычлылыгы тотрыклы финанс күрсәткечләре белән раслана. Быелның беренче яртыеллыгы нәтиҗәләренә караганда, "Ак Барс" банкы 357,6 миллион сум чиста табыш алган. Капитал нормативлары тиешле дәрәҗәдә сак­лана. Әлеге күрсәткечләр банк­ның хәле тотрыклы булуын раслый һәм ул кертемчеләре һәм хезмәттәшләре каршында үз вазыйфаларын тиешенчә үти ала", - диелгән банк хәбәрендә.

Бу атнада Россия Үзәк Бан­кының "Русский инвестиционный альянс" банкының лицензиясен алуы турында да билгеле булды. "Русский Инвестиционный альянс" (акционерлык җәм­гыяте) "РИАБАНК" коммерцияле банкы кредит оешмасының банк операцияләрен гамәлгә ашыру өчен бирелгән лицензиясен алу хакында карар кабул ителде", - диелә Россия Үзәк Банкы хә­бәрендә. Быелның беренче яртыеллыгы нәтиҗәләре буен­ча "Русский инвестиционный альянс" РФ банк системасында 317 нче урында торган.

Чыганак: http://tatar-inform.tatar/news/2017/08/19/146683/