Әтнә таңы

Алинә Европаны шаккатырды

Фигуралы шуу буенча Мәскәүдә узган Европа чемпионатында Россия спортчылары 9 медаль отты. Кыйтганың башка илләренә җыелган спортчыларга исә 3е генә калды. Алтын яулаучылар арасында Казан кызы Евгения Тарасова белән Ижауда туып үскән милләттәшебез Алинә Заһитова да бар. Хәер, Алинә дә спорттагы беренче адымнарын Татарстан бозында ясаган. "Алга барырга вакыт" Узган...

Фигуралы шуу буенча Мәскәүдә узган Европа чемпионатында Россия спортчылары 9 медаль отты. Кыйтганың башка илләренә җыелган спортчыларга исә 3е генә калды. Алтын яулаучылар арасында Казан кызы Евгения Тарасова белән Ижауда туып үскән милләттәшебез Алинә Заһитова да бар. Хәер, Алинә дә спорттагы беренче адымнарын Татарстан бозында ясаган.


"Алга барырга вакыт"

Узган елның декабрь башында Халыкара Олимпия комитетының Лозаннада булган утырышында Россия җыелма командасының язмышын хәл иттеләр. Олимпия Уеннарына кертергәме, кертмәскәме? Ярышырга рөхсәт бирделәр, әмма без­некеләр Россия әләме ас­тында чыгыш ясый алмаячак. Әнә шундый карар кабул ителгән утырышта Россия ягыннан Олимпия комитеты башлыгы Александр Жуков, Допингка кар­шы бәйсез иҗтимагый комиссия җитәкчесе Виталий Смирнов һәм фигуралы шуу буенча ике тапкыр дөнья чемпионы булып танылган Евгения Медведева катнашты. Әйтүләренә караганда, нәкъ менә Мед­ведеваның чыгышы спорт түрәләренең күңелен бераз булса да йомшарткан һәм алар Россия спортчыларына Олимпиадага барырга рөхсәт биргән. Миллионлаган тамаша­чы­ның мәхәббә­тен казанган чемпион чит илдә Россия спортының чисталыгын дәлилләргә тырышкан арада Алинә За­һитова Япо­ния­дә узган Гран-при ярышларын отты. Бу вакыйгага ка­дәр исеме бары белгеч­ләргә генә билгеле булган татар кызы әлеге уңышын Россия чемпионатында да кабатлады. Шулай итеп, спорт кү­гендә яңа "йолдыз" кабынганына беркемнең дә шиге калмады. Ә тамашачы ике чем­пионның бер бозга чыгуын көтте.


Алар узган атнада Мәс­кәүдә узган Европа чемпионатында очрашты. Бу вакыйгага тамашачылар гына түгел, белгечләрнең дә игътибары зур булды. Олимпия Уеннарына барачак спортчыларны да әнә шул ярыш нәтиҗәләренә карап сайлыйлар бит. Ә Пхенчхань медале быел бик кыйм­мәт йөри. Кайсысы остарак - 15 яшьлек Алинәме, әллә 18 яшьлек Евгенияме? Соңгы тапкыр 2015 елның де­кабрендә оттырган Медведевага янә җиңелү ачысын татырга туры килде. Заһи­това исә, хатасыз чыгыш ясап, чираттагы алтынга ия булды. "Мин әлегә ни булганын үзем дә аңламыйм. Әмма бу җиңүнең киләсе ярышларда көч өстәячәген чамалыйм", - диде Алинә ярыштан соң. Соңрак исә үз чыгышына "дүртле" билгесе куйганын, ялгышлар да булганын, аларны төзәтергә тырышачагын әйтте. "Европа чемпионатын отканыма бик сөенәм. Хәзер алга барырга вакыт", - диде ул.


Ни гаҗәп, белгечләр арасында Алинәнең җиңү­ен, татар кызының осталыгыннан бигрәк, көндәше Евгениянең бозга ике айлык тәнәфестән соң әйлә­неп кайтуы белән аңлатыр­га тырышучылар табылды. Заһитова белән Медведева арасындагы ярышны заманында ир-егетләр спортындагы Евгений Плющенко белән Алексей Яһудин көн­дәшлегенә тиң күрүчеләр дә бар. Фигуралы шууның ике бөек остасы арасындагы мөнәсәбәтләр ул вакытта дош­манлык чигенә килеп җитте. Спортта була торган хәл. Ә кызлар дус булуларын яшерми. Алар икесе дә бер тренерда шөгыльләнә. Бер-берсе белән ярышсалар да, Олимпия медален бергә яуларга туры киләчәк.

Реклама


Уңыш көттереп килә

Россиянең Олимпиададагы өметенә әверелгән 15 яшьлек милләттәшебез Ижау­да туып үскән. Әмма спорттагы тәүге адымнарын Татарстанда ясый. Алинәнең әтисе - хоккейчы Илназ За­һитов - спорт сөю­челәргә таныш кеше. Заманында ул Татарстан командаларында да уйнады. 2002 елда аны Лениногорскига чакыралар. Ул вакытта әле Алинә берничә айлык сабый гына була. Илназ дүрт ел шунда чыгыш ясагач, гаилә Әлмәткә кү­ченә. Алинә республиканың нефть­челәр башкаласында фигуралы шуу белән шө­гыльләнә башлый. Аннары алар кабат Ижау­га кайтып китә. Спорттагы беренче җитди адымнарын кызчык Удмуртия башкаласында ясый. Әйтүләренә караганда, күнегүләр ясар өчен алар Әгерҗегә кадәр барып чыга. Шуңа күрә Али­нәнең бүген уңышларын да күпме­дер дә­рәҗәдә Татарстан бо­зының да өлеше бар.


Татар кызына уңыш көт­тереп кенә килә. Әйтик, ике ел элек ул Россия берен­челегендә тугызынчы урын­ны ала. Әмма борынын салындырмаган. Шуннан соң җиңү артыннан җиңү килә. 2016 елда Россия чемпионатында зурлар арасында икенче урынны ала. Әмма 15 яше тулмаган кызга халыкара ярышларда чыгыш ясарга рөхсәт ит­миләр. Ул юниорларның Гран-при финалында беренче урынны алгач кына, зурлар арасында җиңү яуларга керешә. "Үҗәтлеге каян килә дисезме? Ул үзе бу яктан миңа охшаганын әйтә. Ә мин хатыным Ләй­сәнгә рәхмәтле. Бу кадәр тырышмасалар, бер­ни дә килеп чыкмас иде. Бигрәк тә узган ел зур сикереш булды. Хәтта тренерлары да гаҗәпләнә", - ди Илназ Заһитов. Бүгенге уңыш­ларга нигез салучы тренер дип алар Этери Тутберидзены телгә ала. Алинә инде өч ел Мәскәүдә яши…

Илнар Хөснуллин

Тулысы белән укыгыз: http://vatantat.ru/index.php?pg=146

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: