“БАРЫСЫ ДА ХАЛЫК ӨЧЕН”
Күрсәткечләренә куанырлык хуҗалыклар күп, әмма "Ленин исемендәге нәсел заводы" ҖАХК алар арасында аерылып тора.
Тотрыклы, акчалы хуҗалык. Биредә иң мөһиме - кеше, колхозчы факторы. Бу күзлектән карасак, "Ленин"га тиңләшүчеләр сирәк.
ҖАХКның үз колхозчысы яхшы яшәсен, күңел ачсын дигән фикер белән хуҗалык территориясендәге төрле социаль объектларга ярдәм итүен, яңаларын булдыруга зур өлеш кертүен күзалласаң, билләһи, искитәрлек. "Ленин" территориясендә яшәүчеләр белән аралашкач, моңа тагын бер кат инанасың. Ничек "Ленин" халыкка ярдәм итә ала? Каян таба ул андый мөмкинлекне? Хуҗалыкның 8 айлык уңышларына күз салыйк. Бу уңайдан иң мөһим күрсәткеч - рентабельлек. 8 айда "Ленин"ның рентабельлек күрсәткече 27,5 % тәшкил итә. Ягъни, җитештерүгә бер сум кертеп, 27,5 тиен керем алалар ленинлылар. Сүз дә юк, төп керем - терлекчелектән. Күз тиеп, "Ленин"ның сөт чишмәсе саега күрмәсен инде. Көн саен зачет исәбеннән 17 тонна тирәсе сөт сата хуҗалык. Монысы бер хәл, DANON-ЮНИМИЛК компаниясе үзенә сөт тапшыручылар арасында сөтнең чисталыгына, сыйфатына бәйле рәвештә игълан иткән бәйгедә, "Ленин"ның "беренче бишлек"тән түбән төшкәне дә юк. Еш кына I урында баруы белән сокландыра. DANON-ЮНИМИЛК берләшкән компанияләр төркеме составына "Ленин" сөт сатучы "Эдельвейс-М" сөт продуктлары комбинаты" ябык акционерлык җәмгыяте дә керә. Биредә сөтнең сыйфаты соматик күзәнәкләр, аксымнар нигезендә билгеләнә.
2012 елның 8 аенда "Ленин"ның һәр сыеры 4341 кг сөт биргән. Аерым савымчыларга килсәк, әйтик, Гөлназ Корбанова белән кулдаш эшләүче Люция Шакирова бер баш сыердан 6028 кг - физик, ә зачет исәбеннән 6383 кг сөт савып алуга ирешкәннәр. Узган 8 айда алар кулы аша 301334 кг сөт узган. Монысы - физик күрсәткеч. Ә зачет исәбеннән аның күләме 319238 кг булган. Быел хуҗалык урып-җыю уңышлары белән дә куандырды: һәр гектардан уртача 31,4 ц уңыш җыеп алды. "Мега-370" комбайнчысы Инсаф Нигъмәтуллин (фотода) иң югары күрсәткечкә иреште, быел барысы 15500 ц уңыш җыйды. Хәер, максатыбыз - хуҗалык уңышларын күрсәтү. 8 айда "Ленин" 1632 т ашлык, 4097 т сөт, 308 т ит саткан. Болардан 96 млн. 457 мең сум керем алган. Бу субсидияләрне исәпкә алмыйча әле. "Ленин"ның техникасына да күпләр көнләшерлек. Монда чәчү, чәчүлекләрне тәрбияләү, уру - бар да куәтле, шул исәптән чит ил техникалары белән башкарыла. Өстәвенә, ел саен арттыра. Менә быел да 4 "МТЗ-82"дән тыш, "Делаваль" миксеры, "ГАЗ-53" үзбушаткычы, "КамАЗ" прицебы, дисклы чапкыч, салам әйләндергеч (разбрасыватель) һәм "Ворошилка" сатып алган. 8 айда барысы 7 млн. 675 мең сумлык техника алган. ...Кыскасы, Ленинның идеяләре утопия булса да хуҗалыгы бер дигән итеп яши.
Следите за самым важным и интересным в Telegram-каналеТатмедиа
Нет комментариев