БДИ: эксперимент дәвам итә

БДИ хакында сүз чыкса, бик күпләр нәкъ менә шушы А өлешен күз алдында тоталар. Чөнки төп яңалык та, шул ук вакытта, йомшаграк итеп әйтик, сәер яңалык та шушы А өлеше белән бәйле. Берничә варианттан дөрес җавапны сайлап алу кем өчендер файда булса, кемдер бик мөһим баллардан колак кагарга мөмкин бит...

Моннан тыш, барлык гуманитар фәннәрдән дә телдән имтихан бирергә туры килүе бар. Шул ук вакыттка БДИны язмачадан электрон форматка күчерергә планлаштыралар. БДИның телдән бирә торган имтиханын, беренче чиратта, чит телләрдән бирергә туры киләчәк. Ә электрон форматка килсәк, ул иң элек информатикага кагылачак диләр.

Югарыда әйтелгәннәрне кыскача анализлап карыйк. Әлегә кадәр әти-әниләр арасында: "БДИ - дөрес әйбер түгел, бетәчәк ул", диючеләр бар. Үзгәрешләр әзерләүне бу фикергә җавап буларак кабул итү дөрес булыр. Минемчә, БДИны заманчалаштыру, ниндидер үзгәртүләр киләчәктә дә дәвам итәр. Әмма, бетмәячәк. Ә булырга мөмкин үзгәрешләргә килсәк, "Рособрнадзор" җитәкчесе Сергей Кравцов "РГ"га менә ниләр дигән.

- Без БДИның тест структурасын үзгәртергә әзер. Әгәр дә эксперт һәм һөнәри берлекләр имтихан материалларында А өлеше булырга тиеш түгел дисәләр, без җайлап кына аннан баш тартырга әзер. Әмма шуны аңлагыз, бу "Рособрнадзор" карары булырга тиеш түгел. Моны белгечләр хәл итә. Өстәвенә, быелгы БДИга кагылмый.

БДИ проблемасы депутатларны да борчый. Әйтик, Дәүләт Думасы депутаты Вячеслав Никонов чит телләрдән генә түгел, рус теленнән дә телдән имтихан бирдерергә тәкъдим иткән. "Язарга гына түгел, сөйләргә дә өйрәнсеннәр", - дигән. Шул ук вакытта телдән имтихан бирү оештыру һәм технологик яктан бик катлаулы дигән фикер дә бар.Әйтик, өзлексез математик белем бирү үзәге директоры Иван Ященко шул фикердә. Шул ук вакытта ул мкатематикадан ике дәрәҗәдәге БДИ әзерләүләрен хәбәр иткән. Ягъни, аның фикеренчә, математиканы база өзлеше буларак һәм бер юнәлеш (профиль) буларак өйрәнүчеләр өчен төрле дәрәҗәдәге БДИ бирү уңайлырак булачак.

Кыскасы, тагын бер кат ассызыкларга телим: әлегә болар барысы да фаразлар гына. Әмма шунысы факт - үзгәрешләр барыбер булачак. Ә инде "РГ" язганча, Россиянең мәгариф һәм фән министры Дмитрий Ливанов, соңгы үзгәрешләр быелның август аеннан да соңга калмас, дигән.Димәк, 2015 елгы БДИның яңа кагыйдәләре 1 сентябрьдә үк билгеле булачак.