“Берсен бәйләүгә кул икенчесенә үрелә”

Реклама

Илсияр Камил кызы Галиәхмәтова әнә шуларның берсе.
Лаешта туып үскән кыз - хәзер Олы Әтнәдә яшәүче ханым, җәмәгате белән ике ир малай тәрбияли. Өеннән әллә ни ерак булмаган даруханәдә эшли ул. "Бәлки шул сәбәпле, буш вакытыгыз күп буладыр?" - дим.
- Һич юк. Кечкенәдән кызыксындым һәм теләп өйрәндем. Күбрәк әнием өйрәтте. Башта курчакларга бәйләдем. Әллә теләгем көчле булган, өйрәнү һич тә авыр бирелмәде, - ди үзе.
Энә белән дә, "крючок" кулланып та бәйли. Ир кеше булсам да, ул бәйләгән жилет, кофта, күлмәкләргә сокландым.
- Әнеки чәпәләйләр бәйләде, ә мин менә шушыларны бәйләп кидем... Бер чирдер инде ул, - дип көлә.
Туганнары, якыннары да: "Нәрсәгә күзеңне бетереп утырасың?!" диләр икән.
- Юк шул. Берсен бәйләп бетерүгә кул икенчесенә үрелә, - ди.
Әнисенә, дәү әнисенә шәлләр бәйләгән. Элегрәк макрома, бисер белән дә кызыксынган. Шулай да боларга күңеле күбрәк яткан, күрәсең. Үзе моны: "Тормышта күбрәк кирәк булгачтыр", дип аңлата.
Тагын бер төр шөгыле бар - куна такталарына яндырып, бик матур итеп төрле рәсемнәр төшерә.
- Такталар хисапсыз. Әле яңа гына "Әниләр көне" уңаеннан балалар бакчасына соратып алдылар, - ди үзе.
Улларын да рәсем түгәрәгенә йөртә. "Куллары ята, пластилинны да бик матур итеп әвәлиләр", - дип саный. Кечкенәсе без әңгәмә корган бүлмәгә хоккейчы киемнәреннән килеп керде. Чын хоккей остасы булырга хыяллана.
Кул эше турында сөйләшүебезне дәвам иттек.
- Елның бер фасылында 2-3не бәйлим. Кабатларга яратмыйм, - ди Илсияр.
Аннан да бигрәк бәйләргә өйрәтергә яратмый. Укучылар арасында заказ биреп бәйләтү яхшы булыр иде дигән фикерлеләр дә бардыр. Күңелегезне төшерергә ашыгам. Илсияр ханым: "Заказлар алмыйм", - дип кистерде. Тагын бер үзенчәлеге бар. Әйтүенчә, чәчәк, җиләк-җимеш үстерергә, гомумән, җир эшләрен бик ярата.
Боларына тагын бер һөнәр өстәлмәгәе әле. Әнисенең кәрҗин һәм мунчалалар үрә башлавын бер дә юкка әйтмәде бугай...