Без югалттык. Алар тапты...

Кемдер югалта, кемдер таба. Хуҗасына кайсы кайтара, кайсы юк. Кешелек сыйфатлары югалып, байлык артыннан куган бер заманда көн күреп ятыш. Беркөнне фотоаппаратыбыз югалды. Эзләмәгән җир калмады, кайда йөргәнебезне дә барлап карадык, сораштык та, тик юк, табылмады. Өмет өздек, ә без фотоаппаратсыз ике кулсыз. Мәдәният йортында эшлибез, хәзер бит бар эш фотосурәтләүләр аша чагылдырыла. Сөйлә син көннәр буе, без шуның кадәр эшләдек дип. Фотосы булмаса, ышандырып та булмый. Кәгазь, фотосурәт кадерле заман. Бер алган фотоаппаратның экраны ватылгач, 2 мең сум түләп төзәттергән идек. Аның артыннан тормыш иптәшем Райлә Казанга өч кенә тапкыр барды микән. Арзанлы әйбер юк бит хәзер, акчаны җиткерә торган түгел. Уртача хезмәт хаклары утыз меңнән артса да, без аның бер китеген генә күрәбез. Шулай булгач, бу сурәтләү машинасының ни дәрәҗәдә кадерле икәнен аңладыгыз инде. Ут йоттык.Кәеф төште. Шулай кич белән утырабыз, телефон шалтырый. "Сез бер-бер нәрсә югалтмадыгызмы бүген?.."- дип, район үзәк больницасының регистратурасыннан шалтыраталар. Алсу Кадыйрова булып чыкты ул. Шулай диюен ишетүгә, эчкә җылы кереп киткән күк булды.

Фотоаппаратны тормыш иптәшем больницага барганда алдына куйган булып чыкты, онытылып китеп машинадан төшкәндә, затлы әйбер җиргә төшеп калган. Больницада урын-җир алыштырып йөруче Сания тапкан. Ничек безнеке икәнен белгәннәр, диген. Игътибарлы икән үзләре, беркөнне Раиләне көтеп утырганда, регистратурада эшләүче кызларны фотогага төшергән идем. Хезмәт күрсәтүләре ошый, барысы да бик игътибарлы, олыга-кечегә ачык йөз күрсәтеп, каршы алалар. Шунда ук карточканы да табалар, компьютерга кертеп талон да язып бирәләр. Фотоаппараттагы фотоларны караган да, Сания шунда ук Алсуга дәшкэн. Алсу инде безнеке икәнен чамалаган, кичә алып кайттык.

Күңелгә шулкадәр рәхәт булды, бар икән әле игелекле җаннар, бар да мал дип шашмый икән. Без менә шундыйларга тап булдык. Рәхмәтебезнең дә, хөрмәтебезнең дә иге- чиге юк сезгә, ак халатлы шәфкать туташлары. Күңелегез дә халатыгызга тиң икән. Исән - сау эшләгез.

Реклама

(Ак халат кигән бар кешене дә күңелем шәфкать туташы итеп кабул итә.)

Фидаил Кадимов,

Ары авылы