“Бүген балалар күпләп юк...”

ОРВИ авыртуының күпләп артуы турында хәбәр иткән идек. Аздан гына район үзәгендәге балалар бакчасының бер группасы ябылмый калды. Безнең бәхеткә каршы дип әйтикме, көннәр суытты. Ә салкын һава вируслар белән көрәшү өчен иң уңышлы чара. Авыртучылар кимегәнме соң?

- Узган атна башыннан карасак, арту алай зур түгел, бер дәрәҗәдә саклана. 2 пневмония белән авыручы стационарда дәваланды. 13 бала ОРВИ белән авырды. Бүгенге фильтрлар мәктәпләрдә, бакчаларда балаларның күпләп юклыгын күрсәтте. Элемтәгә кереп белештек, ата-аналар көн суык булгач балаларын укырга, бакчага җибәрмәгәннәр булып чыкты...- дип ачыклык кертте район больницасының табиб-эпидемиологы Азат Гыймадиев.