Биектауда Әтнә егетләре дә көрәшә

Муса Җәлил истәлегенә уздырыла торган бил алышулар ике көн дәвам итәчәк.

Әлеге ярышта районыбызның көрәшче егетләре - Галимҗанов Раил Наил улы, 1989 елгы, Шәрәфиев Радик Ирек улы, 1989 елгы, Әхмәтгалиев Азат Морат улы, 1989 елгы, Сафин Руслан Җәмил улы, 1988 елгы... да катнаша. Уңышлар телик аларга!

9-10 февраль көннәрендә Биектауның "Биектау" спорт комплексында каһарман-шагыйрь муса Җәлил истәлегенә "Ватаным Татарстан" газетасы гамәлгә куйган традицион көрәш турниры уза. 55 нче мәртәбә үткәрелә торган бәйге Татарстан район-шәһәрләре һәм күрше Башкортстаннан 399 көрәшчене үзенә җыйды.

Ике көн дәвамында ир-егет көрәшчеләр 10 авырлык үлчәвендә көч сынаша. 60 килограммда - 38, 65тә - 44, 70тә - 44, 75тә - 51, 80дә - 43, 85тә - 39, 90да - 35, 100дә - 40, 130да - 42 һәм 130 килограммнан югары авырлыкта 23 көрәшче бил алыша.

Сүз уңаеннан, әлеге турнир 2015 елда Биектауда узган иде инде. Ул вакытта шушы келәмдә 422 көрәшченең бил алышканын тамаша кылдык. Ә аннан соңгы ике турнир Зәйдә үтте - 419 һәм 378 көрәшче җыелды.

Биектаудагы турнир бүген кичкә кадәр дәвам итә, ачылыш тантанасы көндезге сәгать 1гә билгеләнгән. Җиңүчеләр иртәгә ачыклана.

http://tatar-inform.tatar/news/2018/02/09/157683/