"Берегезгә дә Ходай күрсәтмәсен, уттан берни дә калмый икән, 19 ел буе корган тормыш минут эчендә җир белән тигезләнде.Адәм ышана торган булмады. Көне-төне күз алдымда шул ут..." Сөйли-сөйли дә бер ноктага төбәлеп кала Флера. Ни әйтергә белми тыңлап утырам. Түбән Көек авылында булган янгын турында алдагы саннарда язган идек. -...
"Берегезгә дә Ходай күрсәтмәсен, уттан берни дә калмый икән, 19 ел буе корган тормыш минут эчендә җир белән тигезләнде.Адәм ышана торган булмады. Көне-төне күз алдымда шул ут..." Сөйли-сөйли дә бер ноктага төбәлеп кала Флера. Ни әйтергә белми тыңлап утырам. Түбән Көек авылында булган янгын турында алдагы саннарда язган идек. - 20 март көнне төнге 9 сәгать 30 минут тирәсе иде. Ничектер бөтенесе берьюлы булды. Яп-якты ялкын иде. Өч терлек тә кычкырып янды, сыер 8 март көнне генә бозаулаган иде... Нәрсә алып чыгарга да белмәдек ут эченнән, андый чакта баш та эшләми икән, кечкенә кыз исенә килеп азрак документларны алган, бер өлеше янган. Машина алырга барырга тиеш идек, ул акчаның бер өлеше алынган, бер өлеше калган... коточкыч күренеш, идән астындагы бәрәңгеләр пешкән, кайнатмалар, баллар күп иде... бөтенесе шартлап ярылган... коры җир торып калды... Ярый әле балаларның имтихан бирәсе елы түгел дип сөенәм, берсе - X, икенчесе VIII сыйныфта укый. Аннан да зур куанычыбыз иремнең әнисе, аның өе булды. Ул безне үзенә сыйдырды - ди. Катып калган күңел елый да алмый. Кайгы-хәсрәтне бушата торган савыт юк шул. Аны бүтәннәрнең күңеленә генә бушатып була. Кайгы килсә, хәсрәт басса, тормышларың хәсрәт баскан якка авышыр, дигәннәр күпне күргәннәр."Болай итеп оешма саен соранып йөрермен дип, башыма да китермәгән идем. Ходай берәүгә дә күрсәтмәсен", - ди ул счет номеры язылган кәгазьне сузып. Ире Әнәс Шакиров исеменә ачылган Россия саклык банкындагы счетның номеры: 42307810262165760038/48... саны белән башлана. - Хәленнән килгән кешеләр бәлки ярдәм итәрләр дип йөрү,- дип сүзен дәвам итә Түбән Көек мәктәбенең биология укытучысы. - Миһербанлы кешеләр күп икән, кем ничек булдыра ала, шулай ярдәм итәргә тырыша. Киемнәр китерделәр. Район җитәкчеләре агач материаллары белән булышабыз, диделәр. Кайгыбызны үзенеке итеп кабул итүчеләргә без бик рәхмәтле. Булышырга теләге булучыларга да. "Оятсыз икән болар", дип кенә әйтә күрмәгез, чарасызлыктан инде бу." Бер төптән чыкмаган ботаклар да уралышалар, дип языла әдәби әсәрләрдә. Табигатьтә дә очрый андый күренешләр. Без дә табигать балалары, булышыйк! Ут эчендэ меңгә теленгән йөрәк белән, Шакировларга өр-яңадан йорт күтәрүе җиңел булмас.
