Олы Өшкәтә авылында яшәүче Галия әби Сибгатуллина туган көне белән котлап килүчеләргә рәхмәтен әйтеп, изге теләк теләде. Тәэсирләре зур аның. 90 яшен тутырган әбинең күзләрендә яшь иде. Шатлык яшьләре. Олы кешенең күңелен күрү өчен әллә нәрсә кирәкми шул. Кайвакытта бер җылы караш, йомшак сүз җитә. Ә Галия әби яшәгән җирлек...
Олы Өшкәтә авылында яшәүче Галия әби Сибгатуллина туган көне белән котлап килүчеләргә рәхмәтен әйтеп, изге теләк теләде. Тәэсирләре зур аның.
90 яшен тутырган әбинең күзләрендә яшь иде. Шатлык яшьләре. Олы кешенең күңелен күрү өчен әллә нәрсә кирәкми шул. Кайвакытта бер җылы караш, йомшак сүз җитә. Ә Галия әби яшәгән җирлек өчен мондый игътибар хас нәрсә. Шулай булмаса, олуг бәйрәме белән котлап, хәтта күмәк хуҗалыкның баш хисапчысы да килмәс иде. Күмәк хуҗалык рәисе Илгиз Хәйруллин исә күчтәнәчләр тулы пакет биреп озатып калды. Бәрәскә авыл җирлегенең ветераннар советы рәисе Сөембикә апа Садриева да :
- Бездә 70 яшьтән узганнарны юбилей даталары белән котлау матур традициягә әйләнде. Ел саен туган көннәре белән котларга да онытмыйбыз. Берсен дә читтә калдырмыйча, билгеләп үтәргә тырышабыз, - ди.
"Кулыңнан бер яхшылык килсә, бишне эшлә", ди татар халкы. Бишне генә түгел, үз халкы өчен барысын да эшләргә әзер җитәкче биредә. Тормыш иптәше белән шушы җирлектә туып-үсеп, бар гомерләрен маңгай тирен тамызып күмәк хуҗалыкка хезмәт итүгә багышлаган Галия әби дә хезмәтенең әҗерен татый бүген.
Тормыш иптәше моннан биш ел элек вафат булган. Бер кыз бала тәрбияләп үстергәннәр алар. Ул Казанда яшәгән, эшләгән. Лаеклы ялга чыкканнан соң, әнисен карарга дип авылга кайткан. Тәрбия - тәрбия инде - Галия әбигә күзләр тимәсен. Чиста, матур өендә чын татар әбисе булып түр башында утыра. "Үз әниемне күргәндәй булдым, авыртмагыз, тагын шулай күрешергә насыйп булсын", - диде район башкарма комитеты җитәкчесе Габделнур Мәрдәнов та.
Олы кеше - солы төше, диеп бер дә белмичә әйтмәгәннәр. Киңәшләре бәһасез. Бүгенге тормышның муллыгында, якыннарының хөрмәтендә, кадерлеләрдән кадерле булып яшәсеннәр генә инде алар.
Иң мөһим һәм кызыклы язмаларны Татмедиа Telegram-каналында укыгыз
