“Экология буенча күп эшлибез”

7 октябрь көнне "Школьный экопатруль" исемле III республика конкурсы нәтиҗәләре билгеле була.

Быел катнашучылар ара­сында 1000 һәм күбрәк балл җыючылар да бар. Аеруча Казан, Түбән Кама, Әлмәт, Чирмешән, Спасс, Ютазы укучылары актив катнаша.
Конкурсның идеясе түбәндәгедән гыйбарәт: телефоны булган һәр укучы, укудан тыш вакытта, чүп-чар өемнәрен - чүплекләрне фотога төшереп Та­тарстан­ның мәгълүматлаш­тыру һәм элем­тә министрлыгының колл-үзәк фильтры аша Та­тарстанның экология һәм табигый ресурслар министрлыгына җибәрә. Анда һәр укучы, сыйныф, мәктәп һәм мәктәп муниципалитеты буенча махсус статистика формалаша.
Һәр чүплек буенча табигать саклау органнары тарафыннан күзәтү чаралары кулланыла, ә укучы баллар гына түгел, чүплекнең юк ителүе турында фото беркетелгән хәбәр дә ала. Конкурска мәйданчык йөзендә мобиль телефоннар аша фото-видео хәбәрләр җибәрү өчен iOS һәм Android операция сис­темалары базасында өс­тәмәләр эшли. Әлеге мобиль өстәмә ярдәмендә укучы конкурста теркәлә ала, ә логиннар укучының шәхси кабинетындагы https://edu.tatar.ru порталында бар. Бу кон­курста 1-11 сыйныф уку­чыларының барысы да катнашырга хокуклы.
Бу хакта Олы Әтнә мәктәбенең химия һәм биология укытучысы Ләйсирә Бариевадан да со­раш­тык.
- Нәкъ менә шушы конкурста булмаса да, мәк­тәбебездә экология өлкәсендә укучылар тара­фын­нан күп эшләнә, - ди ул.
Әйтик, "Эковесна" конкурсының узган елгы һәм быелгыларында Олы Әтнә мәктәбе республика буенча җиңүчеләр арасында. Гомумән, бер ге­нә экологик чараны да калдырмаска тырышалар уку йортында. Ел саен экологик мониторинг уздыралар. Мәктәптә экологик юнәлештәге дәрес­тән тыш эшләр дә алып барыла. Иң мөһиме - атнаның һәр сишәмбесендә "Сәламәтлек һәм экология" көне үткә­рә­ләр.
Болар барысы да укучыларны яшь вакыттан ук тирә-як мөхитне, экологияне яхшыртуга юнәлдерү йөзеннән башкарыла. Шулай да халыкка электрон төрдә хезмәтләр күрсәтүне тагын да популярлаштыру өчен нык тырышырга кирәк әле. Бәхәссез, "Школьный экопатруль" ише конкурс­лар­да катнашу моңа җит­ди этәргеч бирә, һәм уку­чыларда актив тормыш позициясе тудыра.