Елатмагыз Марзия әбине – “Әтнә таңы”

Елатмагыз Мәрзия әбине - "Әтнә таңы"

Күшәр авылында яшәүче Мәрзия әбинең сандыгыннан берничә төргәк ситсы материалы югала. Йорт эчендәге карактан арынып булмый, диләр татарда. Мәрзия әбинең дә инвалидлык буенча пенсия алучы өлкән яшьтәге улына төшә шик. Артыгын кыланмаса да, ычкынып китеп эчеп йөргән көннәре юк түгел шул. Төргәкләр эчендә күпмедер күләмдә җыелган пенсия акчасы да була. Әмма анысының күпме икәнен яше 90га җиткән карчык әйтеп бирә алмый. Акчасы кызыксындырмый аны, әнә шул озын төннәр буе интегеп, шәл бәйләп акча җыеп, Үзбәк якларыннан кайтарттырган тукымалары өчен җан әрнүе белән елый ул. Әйе,мондый тукымалар һәркайсыбызның сандыгында юк түгел. Дөньялар авыр заманнарда бик кадерле иде андый ситсылар. Хәзер генә кибетләрдә тулып яткач та. Әниләр аннан мендәр, юрган тышлары тектеләр, матрацлар сырдылар. Әйткәч әйтим инде, 80 еллар ахырында, андый ситсыдан сабантуйга кияргә күлмәккә хәтле теккәнем булды. Ул чакта бик затлы саналды. Менә шул ситсылары дип елга якын күз яшьләре түгә Мәрзия әби. Кызлары да тынычландырып арганнар. Инде әбинең борчылганын белеп, төнлә булса да капка төбенә китереп ташламаслар микән, дигән өметләре дә сүнеп бара. Алып кайтып кына бирерләр иде дә бит, андый Үзбәктән кайткан ситсыларны хәзер чыра яндырып эзләсәң дә таба алмассың... Нәрсә шул хәтле игътибар бирәсез соң, чүпрәк кенә бит ул , диярсез. Аны авыз тутырып сөйләргә дә, җитмәсә газетага язарга?! Әмма һәркайсыбыз аның хәлендә калырга мөмкин. Бүген булмаса, иртәгә. Мәрзия әби, ярар, үзенең ситсылары өчен, үзе тәрбияләгән улының гаебе белән күз яшьләре түгә. Ә менә кемдер шул ситсыларны исеректән бер яртыга алып калып, аның хәтле үк биргән булсалар әле шул "чүпрәккә", нәрсәдер теккән дә булырга мөмкин. Урын -җир әйберсе булса, әбинең күз яшьләре төшәр дип курыкмыйча, ятып йокларга да кирәк бит. Шул сабантуйга колга башына бәйләргә генә биреп чыгарсалар инде. Гадәттә, көрәшсәләр, я берәр бәйгедә катнашсалар, безнең малайларга шул нафталин исе килеп торган ситсы бирәләр. Күшәрдә белмим, ничектер тагын. Сатып алып калсалар да, хет кызларына гына булса да хәбәр салган булсалар, бер яртылык түгел, ситсы бәясе акча биреп чыгарган булырлар иде дә бит... Юк шул, нәфес үзенекен итә... Кыскасы, елатмагыз инде Мәрзия әбине. Яшәгән хәтле яшисе калмаган, ул да бит тормышның ачысын- төчесен татыган кеше. Сугыш ветераны булган ир белән гомер итеп тә, язылышмаган булганга, үзе кебекләр файдаланган күп кенә ташламалардан, хәтта фатирдан да читтә калган карчык бит ул. Күз яшьләре әллә кая китми, һәр адымыбыз өчен җавап бирәсе бар. Бу фани дөньяларда булмаса, мәңгелегендә... Онытмыйк!

Фәридә ФИЛАТОВА