Еллар узуга карамастан, мәктәп елларының хатирәсе күңелдән бер дә җуелмый икән. Фотосурәтләр арасыннан мәктәп елларында төшкәне килеп чыккач та, шул елларга кайтып килгәндәй булдым. Бишенче сыйныфларда укыган вакыт. Кыш көне төшкәнбездер инде, аякта киез итекләр. Уртада - сыйныф җитәкчебез Галим абый Шакирҗанов. Аның бертуган энесе Нил исә безнең сыйныфташыбыз иде....
Еллар узуга карамастан, мәктәп елларының хатирәсе күңелдән бер дә җуелмый икән.
Фотосурәтләр арасыннан мәктәп елларында төшкәне килеп чыккач та, шул елларга кайтып килгәндәй булдым. Бишенче сыйныфларда укыган вакыт. Кыш көне төшкәнбездер инде, аякта киез итекләр. Уртада - сыйныф җитәкчебез Галим абый Шакирҗанов. Аның бертуган энесе Нил исә безнең сыйныфташыбыз иде.
Без 25ләп бала. Галим абый бик төгәл, тәртип ярата торган кеше иде. Уен-көлке белән сөйләшергә яратты. Иртән, укырга килүчеләрне барлаганда берәрсен "Юк", - дисәң, "Юк кеше буламы?" - дип каршы сорау бирә торган иде. Сүз уңаеннан Галим абый күренекле якташларыбыз Лена һәм Луара Шакирҗановаларның әтисе. Тормыш иптәше Хатирә апа исә химия фәненнән укытты. Тагын бер якташыбыз Әсхәт Сәфәровның әнисе Нәкыя Фатыйх кызы безгә рус теленнән белем бирде. Җырга-моңга гашыйк укытучыбыз безне дә шуңа тартты. Җыр дәресләрен дә Нәкыя апа алып бара иде. Сыйныфташларым арасында бик күбесе хәзер инде вафат булган. Укытучыбыз Галим абый, аның тормыш иптәше Хатирә апа да күптән гүр ияләре. Әмма аларның һәм безгә белем биргән башка укытучыларның да якты истәлеге һәркем күңелендә озак сакланыр.
Иң мөһим һәм кызыклы язмаларны Татмедиа Telegram-каналында укыгыз
