Әтнә халкы: “Җиңәчәкбез! Күңел яхшыны өмет итә”

"Фишт" стадионындагы ачылу тантанасын "Каsan-Arena" медиафасады турыдан-туры трансляцияләде, "Россия" каналыннан да карарга мөмкин иде. Безнең спортчыларның байрак йөртүчесе- бобслеист Александр Зубков. Команда составында Татарстаннан 8 спортчы бар, аның алтысы Казанныкы. Уенның талисманы- леопард, ак аю һәм куян. 15 төр уеннарга 98 комплект медаль каралган. Сочида якынча 100 000 тирәсе иминлек хезмәткәре бар. Алар барысы да Федераль иминлек хезмәте контролендә. 2012 елгы Лондон Олимпиадасына караганда 4 мәртәбә артык бу. Моңа кадәр булмаган күзләү системалары, камералар урнаштырылганын да хәбәр итәләр.
Шатланып та, шөбһәләнеп тә көткән бу чарага райондашларыбызның фикере ничек, нинди өметләр баглыйлар, кирәк идеме ул, чыгым гына түгелме, тыныч үтеп китәрме?
Фәридә Җәләлетдинова, Яшьләр эше, спорт һәм туризм бүлегенең әйдәп баручы хезмәткәре:
- Мәгълүматлар белән таныштым, хәбәрдар. Чөнки хезмәтем шундый. Телевизордан күзәтеп барачакмын, фикерләрем дә бик уңай. Күңел гел яхшыны өмет итә. Зур чыгымнар тоталар, дигән фикер әйтүчеләр дә бардыр, бу уеннарның үтүе Россиягә, шул исәптән безгә дә файдалы булыр, дип ышанам. Универсиада үткәрү аркасында Казан бөтен илгә танылды, күпме уңай фикерләр ишеттек. Шәһәребез үзгәрде, төзекләндерелде. Олимпия уеннары да үз эзен калдырыр. Җиңүчеләребез күп булсын иде. Татарстан спортчыларының уңышын күрен тә сөенергә язсын. Имин үтүен бик телим.

Люция Әхмәтҗанова, пенсионер:
- Карашым бик әйбәт. Гомумән, спортка әйбәт мөнәсәбәттә мин. Олимпия уеннарын да кирәкле дип саныйм. Һәр нәрсәнең уңай һәм тискәре ягы бар. Россия командасы сынатмас дип ышанам, иң лаеклылар бара бит. Татарстан спортчылары җиңсә, бу безгә икеләтә шатлык. Иминлек ягыннан, бу уеннарга карата да төрле имеш-мимешләр таратучылар да бар. Хәвеф-хәтәрдән берәү дә имин түгел. Шундый зур чара уздырган хөкүмәтнең иминлек сакларлык кына хәле бардыр, дигән фикердә мин үзем, имин үтәр, Алла боерса. Спорт уеннары берләштерә ул. Ә чыгымнар ягына килгәндә, әрәм ителә торган башка яктан да әрәм була. Чыгасы акча чыга ул, файдага булсын.
Азат Бәйрәмов, иминият хезмәткәре:
- Олимпия уеннарын көтеп алдым, мәгълүматлары белән таныш, кайчан ачылышын да беләм, карап, күзәтеп барачакмын. Олимпия уеннарын уздыру кирәк иде. Россияне таныту өчен дә, үзебезнен көчне сынау өчен дә.... Җиңәчәкбез! Спортчыларыбыз да көчле, җанатарларны әйтмим дә. Бар да яхшы булачак.

Районыбызның уннан артык кешесе белән аралаштым. Күбесенең фикерләре уңай. Һәм алар бертөрлерәк. Бар билгеле аңлый алмаучылар да, "Бушка акча туздыру түгелме бу, мин анлый алмыйм, эшләгән кешесе хәерче хәлендә яши, ә спорт уеннары өчен миллионнар, миллиардлар сарыф ителә. Шулай булгач, илебез ярлы түгел бит, ник халкына түләмиләр икән?" дигән фикерләр дә ишеттем. Һәркем үзенчә хаклы булган заманада яшибез. Олимпия уеннары башлана һәм ул бары шатлыклар гына китерсен, иң мөһиме имин узсын. Халыкның иң зур теләге әнә шул.