Игътибарсызлык фаҗигага китерә - " Әтнә таңы"

Эссе көннәр башланып китте. Күпләр су коенырга дип елга буйларына юнәлә. Еш кына балалар да аларга иярә. Шул ук вакытта өлкәннәрдән башка гына су керергә дип баручылары да юк түгел. " Кызганыч, балаларның мондый адымы еш кына фаҗига белән тәмамлана. Республикада җәй башыннан суга батып үлүче балалар саны көннән - көн арта. Әти- әниләр игътибарлы булсыннар, су буена балаларның үзләре генә баруына юл куймасыннар иде. Сабыйларыбызның язмышына битараф булмыйк, ваемсызлык аяныч фаҗигага китермәсен",- ди балигъ булмаганнар һәм аларны яклау комиссиясенең җаваплы сәркатибе Наилә Баһаутдинова.