Район мәдәният һәм спорт үзәгендә Аграр яшьләр бүлеген оештыру конференциясе булып узды.
Конференциядә район башкарма комитеты җитәкчесе Габделнур Мәрдәнов, яшьләр эше, спорт һәм туризм бүлеге җитәкчесе Марат Сабирҗанов, мәгариф бүлеге җитәкчесе Айрат Каюмов, мәшгульлек үзәге җитәкчесе Зөлфәр Галимуллин, шулай ук Казаннан килгән кунаклар да үз чыгышларында авыл яшьләренә кагылышлы мәсьәләләрне күтәрделәр. Өч сәгатькә якын барган конференциядә: "ТР аграр яшьләр берлеге һәм аның райондагы бүлекләренең эшчәнлеге, иң беренче чиратта, авыл яшьләренең җәмгыятьтә үз урынын табуына юнәлдерелгән. Икътисади, мәдәни, тәрбияви чаралар оештырып, авыл яшьләренең үсешенә җирлек булдыру - берлекнең төп максаты булып тора. Авыл яшьләренең мәгариф, эшмәкәрлек өлкәсендәге инициативасын тормышка ашырырлык программалар булдыру, сәламәт яшәү рәвешен, хезмәтне пропагандалау һәм авылларыбызны торгызу эше нәкъ менә әлеге берлек белән тормышка ашырыла. Безнең алда торган бурыч - әлеге берлекне безнең районда торгызып җибәрү", кебек сүзләр әйтелде. "ТРның яшьләр оешмалары Советы" региональ иҗтимагый оешмасының җитәкче урынбасары Руфия Рәфкать кызы Мөхәмәдиева да үз чыгышында авыл яшьләренең проблемаларын бергәләп хәл итәргә чакырды, шулай ук куйган максатка омтылырга кирәклеген ассызыклап үтте. Волонтер үзәкләре белән үзара хезмәттәшлек итүче бүлекнең әйдәп баручы белгечләре дә яшьләрне әлеге хезмәт белән якыннанрак таныштырдылар. Авыл хуҗалыгы министрлыгыннан килгән кунаклар "Премиум консалтинг групп" компаниясе тарафыннан әзерләнгән "Гаиләле" һәм "Башлаучы фермер" программалары хакында сөйләделәр.
Дөресен әйтим, ТР Аграр яшьләр берлегенең Әтнә районы бүлеге оешу үзе бер зур вакыйга булды. Кирәк, кызыклы, булдырабыз, дип тотынганда эшләмәслек түгел. Районыбыз яшьләрен берләштерү, төрле хезмәтләргә җәлеп итү, вакытларын кызыклы итеп оештыру өчен дә менә дигән мөмкинлек тудыра. Биредә бүлекнең рәисе, составы да сайланды. Инде әйтелгәннәр кәгазьдә, сүздә генә калмас, тормышка ашар дигән өметтә калам.
