ТР Министрлар Кабинетында журналистлар өчен энергетика өлкәсендә кара-каршы субсидияләү (перекрестное субсидирование) һәм эшмәкәрләргә ярдәм программалары хакында брифинг уздырдылар.
ТР Премьер-министры Илдар Халиков әйтүенчә, энергетикага кагылышлысы "Җылылык белән тәэмин итү турында"гы Федераль законга бәйле. Әлеге законнар башлыча Түбән Кама, Чаллы, Уруссу бистәсендә һәм өлешчә Казанда яшәүчеләргә генә кагыла. Әлегә кадәр фатирны энергия белән җылыту бәяләренең бер өлешен предприятиеләр каплады. Шуңа да, бездә башка субъектларга караганда азрак түләделәр. 10 сентябрьдән вәзгыять үзгәрә: дөрес, хөкүмәт бәяләрне 3 ел дәвамында субсидияләр ярдәмендә көйләп торачак. Ул субсидияне алыр өчен документлар пакеты минималь күләмдә кирәк булыр дип ышандыралар.
Видеоконференциянең икенче өлешендә ТР инвестицион үсеш агентлыгы җитәкчесе Линар Якубов чыгыш ясап: "Урта бизнесны җәелдерү буенча без Россиядә беренче унлыкка керәбез", - диде. Кече һәм урта бизнесның финанс әйләнеше үсү куанычлы хәл, республика бюджетына агучы суммалар да арта дигән сүз бу. Төп тема - "Эшмәкәрләргә ярдәм итү сайлап алу программасының I конкурсы нәтиҗәләре"н бәян итү булды. 2012 елдан конкурс кагыйдәләренә үзгәрешләр керде. Хәзер кайсы эшмәкәргә нинди күләмдә ярдәм кирәклекне Агентлыкта эшләүчеләр хәл итми. Моңа 15 кешедән торучы эксперт советының гына хокукы бар.
Конкурста Татарстанның 4 районыннан тыш, барысы да катнаша. Лизинг программасы буенча 600 млн. сум ярдәм суммасы каралган, 180 гариза килгән. Дөрес, 65ен кире кагырга өлгергәннәр дә инде. Социаль бизнес программасы буенча 102 млн.-нан артык суммага 646 компания дәгъва кылган. Инде 502се кире кагылган. Кыскасы, бу программа буенча һәр 6 гаризаның 5се кабул ителмәгән. Инновации программасы буенча 5 млн. ярым сумлык бәйгегә 100дән артык гариза килгән, 31ен кабул иткәннәр. Линар Якубов сүзләренә караганда, кире кагуның формаль сәбәпләре бик күп. Монда бланкларның дөрес тутырылмавы да, вакытында түләнмәгән әҗәт, бюджет бүлеп биргән акчаларны максатчан кулланмау да бар. Конкурс уздыруга финанс ягыннан 60 % күләмендә Россия Федерациясе һәм 40 % күләмендә Татарстан Республикасы ярдәм күрсәтә.
Кыскасы, кызыксынучылар булса, Агентлыкның махсус сайтында барлык мәгълүматлар да бар.
