“ЯЗЫН БОЗЛАР АККАНДА”

Кем ничектер, шәхсән үзем, үзебезнекеләр куйган һәр спектакльне көтеп алам. Концерт-тамашалар, спектакль уйнау­чылар күп булса да, үзебезнекеләр җанга якын.

Яңа ел бәйрәмнәренә кадәр алар нәни тамашачыларыбызны сөендереп, Илгиз Зәйниев әсәре буенча сәхнәләштерелгән "Урман clab" спектаклен тәкъдим иттеләр. Яшь тамашачыларыбыз быелгы спектакльне дә яратып кабул итте. Күптән түгел коллектив Кукмара районында булып кайтты. Зур Сәрдек авылында һәм дә Кукмараның үзендә булып, көндезлә­рен яшь тамашачы­лар­ны сөендерсәләр, кич белән Хәй Вахитнең "Кияүләр" спектаклен уйнадылар.

- Кукмара тамашачысы спектакльләребезне яратып карадылар. 29 гыйнвар көнне Биектау районының Айбаш һәм Мәмдәл авылларында балалар өчен спектакль куябыз, 31е көнне ике спектакль: "Урман clab" һәм "Кияүләр" белән Мамадышка китәбез, - диде театрның директоры Ландыш Фазлыева.

Ә театр коллективы гел иҗатта. Гастрольләргә дә йөриләр. Шул ук вакытта яңа спектакль чыгарырга да әзерләнәләр. Һәм менә 25-26нче гыйнвар көннәрендә янә премьера. Тамашачылар хозурына яңа спектакль тәкъдим ителә. Ландыш белән дә сөйләшүебез нәкъ менә шуның хакында. Ул кыскача гына спектакльнең эчтәлеген сөйләп, кү­ңелләрне җилкендереп куйса да, барлык серне дә чишеп бетерәсе килми. Югыйсә кызыгы китәр. Күзаллау өчен иң мөһимнәре дә тукталыйк. Әсәр композитор егет турында. Музыкаль комедиягә җырларны композитор Зөлфәт Хәким үзе иҗат иткән. Димәк, шәп булачак. Монысы бер. Икенчедән, спектакль заманча. Инде килеп иң кызыгын әйтергә кирәктер - спектакльдә барлык әйберләр дә хәрәкәтләнә. Ишекләр дә килә-китә, өстәлләр, диваннар да йөри.

Реклама

"Язын бозлар акканда" спектаклендә 9 кеше уйный. Төп рольләрдә Сиринә Абдуллина (Ан­гелина), Зөһрә Гали­ева (Әлфисә), Нияз Заһи­дуллин (Вәяз), Фаяз Хөсәенов (Әмир), һәм дә Таһир Фәйзрахманов (Гакыйф), Гөлия Сибгатуллина (Нурдидә), Рәмис Галиев (военком), Марат Хәбибуллин (Әвеш Тәвешевич), Айгөл Гыйрфанова (Зөлфирә).

Зөлфәт Хәкимнең әсәре Әтнә сәхнәсендә беренче генә уйналмый. Театр сөюче тамашачының "Мин сине яратам" спектакле әле дә исендә. Кунак булып килгән Зөлфәт Хәким үзе дә артистлардан ким дулкынланмады ул чакта. Сәбәбе дә бар иде. Әтнәлеләр уйнаган спектакльне караганнан соң, журналистыбыз Сүрия Мингатинага биргән әңгәмәсендә:

- Чакыру алганнан бирле җаныма урын тапмадым. Ничә еллар элек, телевизор булмаган вакытта язылган әсәрне бүгенге көнгә туры китереп ничек уйнарлар икән, дип борчылдым. Ә тамашачы аны исе китеп күз яшьләре белән карады. Әтнә тамашачысының бәясе, әсәрне кабул итүе гади генә бәя түгел, аларның һәр сүзе ихлас, - дигән иде.

Автор бәлки бу спектакльне дә карарга кайтыр. Аның ышанычын аклыйсы иде!