Каркасы да, коймасы да профильдән

Югары Сәрдә авыл җирлегеннән алган хәбәрләргә караганда, биредә бүгенге көндә зират коймасын яңарталар. "180 метр араның каркасы да, коймасы да профильдән була. Соңыннан аны яшел төскә буйыйбыз", - ди җирлек башлыгы Рәшит Хөснетдинов. Узган елны 280 метр араны шулай яңарттылар, бу хакта газетада хәбәр иткән идек. Тагын бер күңелле яңалык - хәзер Югары Сәрдәнең теләсә-кайсы авылына, тыкрыгына теләсә-нинди һава торышында курыкмыйча кереп була - таш түшәлгән. Җирлек зур суммада грант откан иде, шул акчага янгын сүндерү машинасын ремонтлатып, кышка кергәнче гараж салырга планлаштыралар.