Күңел могҗизага ышана

Кыш бабайга күптән ышанмыйбыз.

Без бит күптән олы кешеләр.
Кыш бабайны көткән оныкларга
Көнләшәләр безнең ишеләр.

Ә шулай да яңа ел алдыннан
Күңел могҗизага ышана.
Сәгать уникедә өй алдына
Килеп туктар кебек ак чана.

Чал Кыш бабай төшәр кебек аннан,
Сөйри-сөйри авыр капчыгын.
Котлар кебек яңа еллар белән
Һәм бушатыр бүләк янчыгын.

Әнисезгә әни табып бирер.
Сау-сәламәт булыр чирлеләр.
Бар дөньяда тынычлык урнашыр!
Бәхет табар барлык кешеләр.

Нидер өмет итеп яңа елда
Балаларча күңел куана.
Яңа ел алдыннан бар кешедә
Бик эчтә бер сабый уяна...