Күңгәр мәктәбе укучысы

Реклама

Күпләр әлеге егетне 11 нче сыйныф укучысы гына дип белә. Ә аны якыннан белүчеләр артык күп түгел. Әйе, Разил - Күңгәр мәктәбе укучысы. Әйе, ул чибәр. Тагын ниләр яшеренә икән соң бу егет артында?
Карап торышка, ул гап-гади егет. Ләкин якыннан танышсаң, аның үзгә, калганнарга бик үк ошамаганын тоясың. Шаян, шул ук вакытта җитди, максатчан, тырыш, ләкин бераз гына ... Юк, Разилнең бу сыйфатын, никтер, атыйсым килми, чөнки мин аны ул шундыйдыр дип,күпме генә тырышсам да, берничек тә күз алдына китерә алмыйм. Әнисе - Гөлназ апа сүзе буенча гына әйтүем.
Кечкенәдән математика, физика белән җенләнә ул. Хәер, аның кызыксынмаган, белмәгән фәне юк та бугай. Шулай булмыйча, без төсле рәсемле китаплардан әкиятләр укыган вакытта, Разил инде биология укый иде. Шуңадыр, ике ел рәттән экология буенча фән олимпиадасында республика һәм төбәк этабында җиңүче була яки призлы урын ала. Бу җиңүләр артында күпме хезмәт торуын, мөгаен, үзе һәм укытучысы Хәмдия апа Галиева гына беләдер.
Разилнең уңышларын саный китсәң, бик күпкә китәр дип уйлыйм. Шулай да 2013 нче елдагы җиңүләренә тукталып үтәсем килә. Каюм Насыйри исемендәге XI яшүсмерләр фәнни-тикшеренү укуларының төбәкара этабында - 1 урын, Фәнсар мәктәбендә инглиз теле остаханәсенең Дипломы, Сәләт халыкара уку-укыту форумының ШТК мәҗлесе чарасында - 1 нче дәрәҗә Диплом, шунда ук актив катнашкан өчен Диплом, "Инглиз теле мәктәптә" халыкара конкурсының беренче турында II дәрәҗә Диплом, икенче турында III дәрәҗә Диплом белән бүләкләнә. Сокланырлык күрсәткечләр.
Әйткәнемчә, Разил бигрәк тә төгәл фәннәрне үз итә. Аларның сыйныф бүлмәсенә ничә тапкыр керсәң дә, аны классташлары урап алган була. Нәрсә турында сөйләшәләр дисәң, аның кызып-кызып сыйныфташларына математика, физика аңлатып яткан вакыты була. Дуслары әйтүенчә, өйрәтүе дә нәкъ укытучыларныкы кебек: төгәл һәмаңлаешлы. Башкаларны өйрәтә алу сәләте теләсә кемгә бирелми бит. Кемдер теге яки бу фәнне үзе бик яхшы белсә дә, калганнарга аңлата алмый яисә өйрәтергә теләми. Ә Разил вакытын кызганмый. Әлеге сыйфаты аның ярдәмчел, кешелекле һәм тагын бик күп күркәм гадәтләргә ия булын раслый.
Разилне алда зур сынаулар көтә. Ышанам: ул аларны да намус белән башкарып чыгар, киләчәктә теләгән һөнәрен алып, илебезгә зур файда китерер. Булдырыр, чөнки аның барасы юлы, нәкъ үзе кебек, туры.