Полиция хезмәткәрләренең ел саен уза торган "Полиция Кыш бабае" акциясе кысаларында, быел да район полиция хезмәткәрләре авыр хәлле гаиләләрдә тәрбияләнүче балаларны барлап, бүләкләр өләштеләр.
Полиция бүлеге хезмәткәрләре белән бергә мин дә Бәрәзә, Бәрәскә авылларында шундый гаиләләрдә яшәүче балалар белән аралашып кайттым. Мөлдерәп күзгә карап торган сабыйны бүләк биреп куандыру бик зур савап, минемчә. Нәрсә дисәң дә, бу балаларга гаиләдә дә, җәмгыятьтә дә игътибар җитеп бетми. Нишләтәсең, андый гаиләдә тууына бала берничек тә гаепле түгел. Әти-әнине дә сайлап алып булмый. Менә сез шул баланың ничек өметләнеп бүләк көтүен күз алдына китерегез. Иркәләнеп үскән бала түгел ул, еш кына ана назы да күрмәгән... Яңа ел бүләге турында кайсы-берсе хыяллана да алмый. Ярый балалар бакчасына йөрсә яки мәктәп яшендә булса. Гаилә чыннан да бик авыр хәлдә булып, әти- әни бер җирдә дә эшләмәсә?! Бер гөнаһсыз сабыйның ни гаебе бар соң? Менә Бәрәскә авылыннан Ирек Сафин. Үзе Яңа Кенәр интернат-мәктәбендә белем ала. Шахмат ярышында катнашып, урын да алган. Авыр тормыш шартларында яшәгән бу бала өчен Кыш бабай кулыннан бүләк алу бик зур сөенеч булды. Һәм бер Ирек өчен генә дә түгел. Полиция капитаны Илнар Закиров, стажер Альмир Хөсәенов һәм полиция бүлегендә сәркатип булып эшләүче Римма Нурмөхәммәтова Күәм, Үртәм, Бәрәскә, Өшкәтә, Мәңгәр, Кызыл Утар, Киме, Кышлау, Бәрәзә авылларында авыр хәлле гаиләләрдә яшәүче балаларга шатлык бүләк иттеләр. Сабыйларның күңелен күреп, бәйрәмдә дә аларны онытмаган полиция бүлеге хезмәткәрләренә зур рәхмәт әйтәсе килә. Бу куанычлы мизгелләрне балалар әле озак онытмаслар.
