Әтнә таңы

Кызлар кыздырды

Түбән Көек мәдәният йортында, РТС (Яңа Әтнә) үзешчәннәре килеп "Кызлар кыздыра" дип исемләнгән 2 сәгатьлек концерт белән шаккатырдылар.

Икеләнеп килми калучылар да күп булгандыр, ниш­лисең, артистлар түгел бит алар! Концертка килеп 2 сәгать буе "Мунча ташы" күренешләре белән бәйләнгән көлдермешләре, сәнгатьле итеп укылган нәфис сүзләрен, җырларын тыңлау, биюләрен карау килгән барлык тамашачының да күңеленә ямь өстәми калмагандыр. Без өйрәнгән бит инде, "әй, малай-шалайлар концерты җүнле буламыни ул", дип. Вәт менә, дөрестән дә исеме җисеменә туры килде. "Кыздырып мы кыздырдылар".

Тормыштан алган маҗаралар, авыл халкының сөт бирү күренеше белән башлап җибәрделәр (Мөхәммәтҗанова Зөһрә һәм Солтанова Сөмбел), ике кодагый булып җырлаган шаян җырларын тыңлаганда, Әтнә театры артистлары Гөлнур апа белән Гәүһәрия апалар искә төште. Ул исерек Кортыш (Кадрия Закирова), Йолкыш (Камалиева Эльмира) уйнап та карадылар. Йолкышының күкрәгенә күз төшмәсә, егет кеше дип уйларсың валлаһи, "Мунча ташы"на барып уйнасалар да була. Биюче кызлар, егетләр дә югалып калмадылар. Мари биюен башкаручыларны аерым әйтми мөмкин түгел (Бариева Инзилә, Галимов Ильяр), чын марилар диярсең, йөзләре үк сәхнәне бизи. Авыл советы хезмәткәре Садыкова Әлфия белән Галимова Эльмираның кияүгә баручы әбиләр ролен бик оста уйнадылар, Әлфияне чын Серафима Гусева дияргә була. Электр элемтә бүлегендә эшләүче Реваль Әхмәтҗанов җырлап тагын да җанландырып җибәрде, "Җырлыйк әле" конкурсында катнашып, чыгыш ясаган Дамирә апайның тавышына сокланмый мөмкин түгел. Баянга (баянчылары Мансур абый, Фарис Биккинин) кушылып җырлыйлар. Алып баручы Сылу исемле кыз да бик оста.

Реклама

Концерт программасын төзүчеләр - Гыйлаҗева Алсу, Шәрәфиева Сәлимә. Ялыктырмый торган, бай эчтәлекле, кеше күңеленә үтәрлек итеп уйлаганнар. Боткага да тиешле тәмләткечләрен салып пешермәсәң тәмле булмый. Тәме дә, шикәре дә, балы да, тозы да җитәрлек булган. Әзер артистлар концертын карарга өйрәнеп беткән бер мәлдә, менә сиңа мә, үзебезнең арада да артистлар күп икәнлегенә инанасың. Концертта катнашучыларның барысы да башка тармакта эшләүчеләр, артистлар кебек шул концерт номерлары өстендә генә эшләп утырмыйлар, нинди зур концерт әзерләгәннәр.

Афәрин Ыртыеслылар!

Нравится
Поделиться:
Реклама
Комментарии (0)
Осталось символов: