ТР хөкүмәтенең махсус карары нигезендә, ел саен бер мәдәният йорты төзелү хакында язган идек инде...
Түбән Бәрәскәдәгесе быел ук гамәлгә керергә тиеш. Апрель башларында элекке мәчет, хәзерге мәдәният йортыннан әллә ни ерак түгел, яңасына нигез салдылар. Бу хакта төзелеш объекты подрядчигы ООО "Арча МСО"ның мастеры Алмаз Закиров сөйләде.
- Башта объект буласы урыннан балчыкны чыгарып, тигезләдек. Фундаментны апрельдә үк салдык, - диде ул.
Әлеге объектның заказчысы - ГКУ Главинвестстрой. Димәк, эшнең ахыры яхшы тәмамлануга өмет бар. Күпчелек төзелеш объектларының заказчысы ул. Башланган эш - беткән эш, диләр. Тик чиста су кертеп халыкны куандыру ниятеннән Олы Әтнә урамнарында казылган чокыр-чакырны күзаллагач, кайвакыт бетермиләр дә шул, дигән фикергә киләсең... Ә биредә инде кәрниз өлеше өелә башлаган объект каршы алды. Иң беренче күзгә ташланганы - тышкы матурлыгы. Бинаны сары "облицовка" кирпечтән, ә ишек, тәрәзә кырыйларын көрән төстәге белән өйгәннәр. Эчке яктан газобетон белән әйләндергәннәр. Матур да, җылы да, кыскасы, ерактан ук үзенә әйдәп тора.
- Кирпечтән өю өлеше тиздән тулысынча тәмам була, монда 10 кешелек бригада эшли, 1 краныбыз да бар. Иртәнге 7дән кичке 6га кадәр эшлибез. Графикка сыешабыз, озакламый чып-чын мәдәният йорты кыяфәте керер. Ә көз көне тулысынча куллануга тапшырырбыз, - ди мастер.
Фотога төшерергә дигән ният белән төзүчеләр янына баргач, безне:
- Каскалар кия күрегез, - дип каршы алдылар.
Шунда ук төзелеш яңалыклары белән таныштырдылар. Кайда сәхнә, кайсы урында грим бүлмәләре буласын күрсәттеләр. Эчтән караганда, тәрәзәләр тагын да иркен күренәләр, яктылык җитәрлек керер кебек. Шушы фикеремне әйтергә өлгермәдем:
- Монда бик җылы да булачак. Нигезне балчыкны тигезләп салдык, нык та булыр, - диделәр.
Х.ГАРИПОВ фотосында төзелеш барышы.
Иң мөһим һәм кызыклы язмаларны Татмедиа Telegram-каналында укыгыз
