Күршебез – Зәмзәмия апа

Яхшылык эшлә дә суга сал,

Халык белмәсә, балык белер.

Гәҗиткә бер дә язганым юк иде. Күңелемнән генә, мондый кешенең яхшылыкларын язмасам гөнаһ булыр, дидем. Бәлки кемдер гыйбрәт алып, үзе дә изгелек эшләр.Сүзем Олы Әтнә авылының Марсель Сәлимҗанов урамында яшәүче күршебез Зәмзәмия Зиннәтова турында.

Реклама

Безнең урамга да асфальт җәеп киттеләр, сөенеп бетә алмыйбыз. Тик менә бал кисмәгенә бер тамчы дегет тамып калды. Ике катлы йортлар янында, ике җирдә икешәр чүп контейнеры бар. Юл эшләгәндә шулар каршындагы балчыкны кузгатып, кешеләр дә, чүп алып китүче машиналар да керә алмаслык хәлгә китереп калдырдылар. Югыйсә, бер трактор чүмече таш җитә иде. Әйткәләп карасак та, беркемгә дә кирәк булмады. Коммуналь хуҗалык оешмасының машинасы килгән саен бата-чума азаплана иде. Шушы галәмәтләрне күреп, эче пошып, 66 яшьлек II төркем инвалид Зәмзәмия апай, күршеләре Фаил, Резеда, улы Рамазан һәм Тәнзиләне шунда алып чыгып, машина эзенә ватык кирпеч, таш, ком ташып тутырдылар. Аны төеп, таратып, рәхәтләнеп үтеп йөрерлек иттеләр. Икенче көнне чүп алырга килгән шофер Фәнис зур рәхмәтләр әйтеп, контейнерларны бернинди тоткарлыксыз бушатып китте. Әле ул гына да түгел. Башка контейнерлар янында таралып яткан утын кисәкләре, пакетлар, кәгазьләр яныннан оялып уза идек. Коммунальныйга шалтыратып, аларны да алдырган. Зәмзәмия, Рәшидә апайлар һәм Рифкать абый чүп түгү машинасы килгән саен көрәк, сәнәк, себерке күтәреп чыгалар. Артыннан коелганнарын җыештырып, контейнерга тутыралар.

Хәзер бу турыдан узарга ук күңелле. Зәмзәмия апай исән-сау булганда, гел шулай булыр, дип, сөенәм. Аңа рәхмәтләр укыйм. Инде безгә, аның күршеләренә, ике катлы йортларда торучыларга шушы тәртипне саклап торырга кирәк. Якын тирә-күршеләрнең хәлләрен дә белешеп тора ул, кирәк булса, ярдәм итәргә һәрвакыт әзер.

Әле урам утын булдырырга хыялланып йөри. Авыл җирлеге җитәкчеләре белән сөйләшүләр алып бара. Тотынгач, бу эшне дә башкарып чыгар. Шундый ул игелекле күршебез, заманында газ торбаларына акча җыеп, аларны Казаннан алып кайтып, урамыбызның 44 хуҗалыгын газга ялгарга булышкан кеше ул, Зәмзәмия апай.