Кулны кулга тотышып эшлиләр
Кышлау авылы уртасында гөлчәчәкләргә күмелеп утырган бик мәһабәт бина бар. Башлангыч мәктәп - балалар бакчасы урнашкан бина бу. Чыннан да, ерактан ук чисталыгы, каралган булуы белән үзенә жәлеп итеп тора ул.
Моннан берничә еллар элек биредәге балалар бакчасында семинарда булырга туры килгән иде. Ул чакта балалар бакчасы мәктәп белән бергә түгел иде әле. Иске бинада булуына карамастан, монда бөтен нәрсәнең бары сабыйлар мәнфәгатен кайгыртып эшләнгәнлеге күзгә бәрелеп тора иде. 2008 елда башлангыч мәктәп бинасына капиталь ремонт булганнан соң, балалар бакчасын да шушы бинага күчертеп, мәктәп-балалар бакчасы итеп үзгәрткәннәр. Бүгенге көндә балалар бакчасына 16 бала йөри, башлангыч мәктәптә 18 бала укый. Укытучылар Лилия Сабирова, Гөлназ Һадиева, тәрбиячеләр Равия Абдуллина һәм Миләүшә Газизова, тәмле ашлары белән сыйлаучы Алия Сираҗиева, тәрбияче ярдәмчесе Лилия Зиннәтуллина һәм техничка Нурсөя Гәрәева составындагы коллективны тәҗрибәле педагог Гөлнара Бари кызы Нигъмәтҗанова җитәкли. Бергәләп "Гаилә бәйрәмнәре" үткәрү дисеңме, Габдулла Тукай туган көнгә багышланган һәм "Зеленый огонек" бәйгесенең район этапларында 1 урын алулар дисеңме. Бер дә эшсез тора белмиләр алар.Бакча яны участогында яшелчәләр үстерергә дә, аларны кышка салатлар итеп әзерләп куярга да өлгерәләр. Бинаның эчке ягы да бик матур, чиста. Сыйныфлар якты, уку әсбаплары да, методик материаллар да җитәрлек. Укытучылары да яшьләр, һәр яңалыкны отып, эштә кулланырга гына торалар. Бакча ягы турында әйтеп тә тормыйм. Андагы уенчыкны минем бүтән бер балалар бакчасында да күргәнем юк. Алда искә алып үткән тәрбияче Равия Абдуллина турында мәгариф бүлеге белгечләре дә: "Бик иҗади эшләүче, фантазиягә бай тәрбияче", - дип, яхшы яктан гына телгә алдылар. "Мәктәп белән балалар бакчасының бер бинада булып, икесенә берьюлы җитәкче булуы авырмы?" - дип сорыйм Гөлнарадан. Ә ул авырлыктан бигрәк, балалар өчен уңайлыкларын сөйләп китә. "Биредә сабыйлар кечкенәдән үк мәктәпнең нәрсә икәнен белеп, аңлап үсәләр. 1 сыйныф укучыларында була торган табигый стрессны да җиңелрәк кичереп, мәктәпкә тизрәк ияләшәләр.Бәйрәмнәрне, төрле кичәләрне дә бергәләп үткәргәч, берсен-берсе белеп, берсенә-берсе ярдәм итеп торалар". Күмәк хуҗалык, җирле үзидарә рәисләренә дә рәхмәтле ул. "Койма корып бирделәр, ремонт вакытларында акчалата да, әйберсен алып кайтып биреп тә бик булыштылар", - ди. Әти-әниләре күмәк хуҗалыкта икесе дә эшләгән очракта - 50 %, берсе генә эшләгән очракта 25 % балалар бакчасы өчен бәяне күмәк хуҗалык түли икән. Нинди зур ярдәм бит бу гаиләгә! "Безгә уен мәйданчыгы кирәк инде, анысын да рәисебез Алмаз Сибагатуллин: "Язга эшләп куярбыз" дип вәгъдә итте. Ә аның сүзендә тормый калганы юк", - дип төгәлләде сүзен җитәкче ханым. Менә шулай яшәп, эшләп яталар Кышлау башлангыч мәктәп-балалар бакчасында. Аларга киләчәктә дә уңышлар юлдаш булсын дип телисе генә кала.
Иң мөһим һәм кызыклы язмаларны Татмедиа Telegram-каналында укыгыз
