КҮП ФУНКЦИЯЛЕ БУЛАЧАК

Татарстан Президенты Рөстәм Миңнеханов районнар белән үткәргән видеобрифингта шундый саннар яңгырады. Өстәвенә, 2013 елга торак төзеп тапшыруның айлык планына кадәр эшләнелгән, димәк, йөкләмәне ел ахырына куып җитәбез дип акланулар була алмый. Социаль ипотека буенча 19 йорт, ягъни, 1624 фатир - барысы 92 мең квадрат метрга якын булган. Ә менә тузган торак буенча мәгълүматлар кызыклыгына тап булдым: 2012 ел башына шундый 363 мең квадрат метр торак теркәлгән булса, төзи торгач аларның саны арткан - хәзер 400 мең квадрат метрдан күбрәк, әле Казан шәһәре буенча тулы мәгълүматлар алынмаган! Республиканың төзелеш, архитектура һәм ТКХ министры Ирек Фәйзуллин әнә шулар хакында сөйләде. Әйтүенчә, ел ахырына кадәр һәр күпкатлы йортны техник паспортлы итү һәм кадастр учетына бастыру бурычы тора. Хөкүмәттә һәр шундый йорт буенча тулы мәгълүмат булдыру өчен кирәк бу. Паспортта, әйтик, йортның халәте, капиталь ремонт кайчан булган һ.б. шундый саннар булачак.

Республикада 381 Бөек Ватан сугышы ветеранына 34 йорт төзелә. Шунысы да бар, Татарстан буенча да, безнең районда да чиратка басучылар артып тора. Алган мәгълүматларга караганда, проблема Федераль үзәктән күчерелгән финанска бәйле рәвештә үз вакытында уңай хәл ителә. Татарстанның хезмәт, мәшгульлек һәм социаль яклау министры Айрат Шәфигуллин сүзләренә караганда, бүгенге көндә торак шартларының яхшыруын 1 меңләп ветеран көтә. Республикага 1 млрд.-тан артык суммада федераль транш килгән үзе, әмма РФның төбәкләр үсеше министрлыгы әлегә 1 квадрат метр торакның бәясен тәгаенли алмый интегә. Киләсе транш җәй урталарында булыр дип көтелә. Ә Татарстанның төзелеш, архитектура һәм ТКХ министры сүзләренә караганда, бездә күп кенә махсус программалар буенча торакның 1 квадрат метры 29,8 мең сум дип бәяләнә.

"Авыл клублары" программасы буенча 2013 елны 46 мәдәният объекты сафка басарга тиеш. 16 объектта эш бара: унысында фундамент салалар, янә алтысында бу эш тәмам. "3 объектта кирпечтән стена өя башладылар", - диделәр. Иң куанычлысы - аларның берсе бездә башкарыла. Күрше Арча, Мамадыш районнарыннан тыш, Күлле Кимедә дә күп функцияле - үз эченә мәдәният йортын, ФАП һәм китапханәне, шулай ук авыл җирлеген алучы объект төзелә башлады.

Күп балалы гаиләләргә җир участоклары бирү өлкәсендә тоткарлыклар юк. Бездә 118 кешегә бирелгән инде. Шунысы факт: бу - туктаусыз процесс! Ахыр чиктә, ир белән хатынга бәйле. Бу сан артуга таба үзгәреп тора.

Автор фотосында махсус программа нигезендә, Күлле Киме авылының иске мәдәният йорты янәшәсендә яңасы төзелә.