Милли матбугат яшәргә тиеш
Шушы көннәрдә Казанда V Төбәк һәм милли массакүләм мәгълүмат чаралары форумы уза. Татарстанга Россиянең 30 субъектыннан масс-медиа вәкилләре җыелды. Форумда катнашучылар республикабызның милли мәгълүмат чаралары тармагы белән танышты. Чарада милли һәм төбәк массакүләм матбугатның бүгенге хәле, аның үсеш перспективалары хакында җитди сөйләшүләр булды. Форумда катнашучылар Россиянең төрле почмакларында милли телләрдә...
Шушы көннәрдә Казанда V Төбәк һәм милли массакүләм мәгълүмат чаралары форумы уза. Татарстанга Россиянең 30 субъектыннан масс-медиа вәкилләре җыелды. Форумда катнашучылар республикабызның милли мәгълүмат чаралары тармагы белән танышты. Чарада милли һәм төбәк массакүләм матбугатның бүгенге хәле, аның үсеш перспективалары хакында җитди сөйләшүләр булды. Форумда катнашучылар Россиянең төрле почмакларында милли телләрдә чыгучы матбугат чаралары проблемаларын хәл итәргә тырышты. Милләтләр һәм конфессияләр арасында дуслыкны саклауда мондый газета-журналар, радио, телевидениенең роле турында аерым билгеләп үтелде. "Татмедиа" Республика матбугат һәм гаммәви коммуникацияләр агентлыгы генераль директоры Ирек Миңнәхмәтов форумга илебезнең иң ерак төбәкләреннән кадәр килгән кунакларны, 10 милләт вәкилләрен туган телләрендә сәламләде. Моннан соң ул әлеге чарада катнашучыларга Россия Дәүләт Думасының милләт эшләре буенча комитеты рәисе Гаджимет Сафаралиевның мөрәҗәгатен җиткерде. Форум эшендә катнашкан Матбугат һәм массакүләм коммуникацияләр федераль агентлыгы җитәкчесе Михаил Сеславинский басма матбугат чараларының иң борчулы мәсьәләләренә тукталды. "Россия почтасы" быел газета һәм журналларга яздыруга өстәмә субсидияләрсез калуы нәтиҗәсендә бүген басмалар ничек исән калырга дигән шөбһәле уйлар белән яши бит. - Төбәк һәм милли массакүләм мәгълүмат чаралары - бизнес-проектлар түгел. Дәүләт массакүләм мәгълүмат чараларына, һичшиксез, ярдәм итеп торырга тиеш, - дип белдерде Михаил Сеславинский. Татарстан Дәүләт Советы рәисе урынбасары - Журналистлар берлеге рәисе Римма Ратникова, үз чиратында, форумның нәкъ безнең республикабызда үткәрелүе очраклы хәл түгел, дип билгеләде. - Милләтләр арасында тыныч, дустанә мөнәсәбәтләр саклау безнең игътибар үзәгендә булган мәсьәләләрнең берсе. Дөньяда 180гә якын милләт вәкиле булса, шуларның 115е бездә яши, - дип ассызыклап үтте ул. Пленар утырышта шулай ук илнең төрле төбәкләреннән килгән вәкилләр чыгыш ясады. Якутиядән килгән коллегабыз, "Ситим" медиа группасының генераль директоры Мария Христофорова да: - "россия почта"сының субсидиясез калуы нәтиҗәсендә милли басмалар бик авыр хәлдә калды. Бүгенге көндә безнең республикада да язылу кампаниясе 70 процентка ук кимергә мөмкин. Кул кушырып утырырга ярамый, тиз арада чарасын күрергә кирәк, - диде. Соәыннан "Күп төсмерле Россия" VII бөтенроссия бәйгесе җиңүчеләрен бүләкләү тантанасы булды. Бүгенге көндә кунаклар татар халкының милли бәйрәмнәренең берсе булган Сабантуйңа бәйрәмен карыйлар..
Иң мөһим һәм кызыклы язмаларны Татмедиа Telegram-каналында укыгыз
