Нәни булса да – “йолдыз”
Габделфәт Сафинның "Уф алла арбасы" җырының клибы кемнәрнең генә күңел кылларына кагылмый калды икән. Клипның геройлары авылдашларым булгангамы, йөрәккә тагын да якын.
Катнашучылар - Олы Мәңгәр егетләре Рәсим һәм Раяз Сәләхетдиновлар, ә әни ролендә әниләре Рәзинә икәнлеген тирә-як авылларда яшәүчеләр танып алгандыр. Бу матур гаилә белән күптән таныш без. Әтиләре Рафис белән бер мәктәптә укыдык. Әле Мәңгәр халык театрының режиссеры булып йөргән заманнарда, ул куйган спектакльләрдә катнашу бәхете үземә дә насыйп булган иде. Тырыш, үҗәт, максатына ирешә торганнардан. Театрга җаны-тәне белән бирелгән. Мәңгәр театрына, аның халык театры исемен алуга зур өлеш керткән кеше. Хәзер инде Арча шәһәренең "Җидегән чишмә" халык театры режиссеры. Әлеге клипның сценарий авторы да Рафис үзе. Рузилә Сафина белән киңәшеп сөйләшкәннән соң, ике көн эчендә төшерелгән клип. "Күренешләрне Арча районы Симетбаш авылында төшердек. Без килгәндә барлык кирәкле әйберләр - киемнәр, арба әзерләнеп куелган иде", - ди Рәзинә. Ул үзе дә әлеге дә баягы шул ук Мәңгәр театрында чирканчык алган. Иҗади гаиләдә тәрбияләнеп үскән уллары да әтиләре юлыннан бара. Олы уллары Рамазан Арча педагогия көллиятенең музыка факультетында, 3 курста укый. "Арча егетләре" ансамблендә җырлый. Ул гына да түгел, көллиятнең драма түгәрәген җитәкли. Рамазан әзерләгән Аманулланың "Әле кичә генә яз иде" спектаклен махсус комиссия караганнан соң бик югары бәяләгән. Спектакль октябрь аенда Чаллы шәһәрендә узачак "Иделкәем" яшьләр театр фестивалендә күрсәтеләчәк. Клипта катнашкан уртанчы уллары Рәсим 5 сыйныф укучысы. Көрәшче егет, җырга- биюгә дә бик оста. Концертлар алып барган вакытын күргәнем бар, Рафисның яшь чагын хәтерләтә. Инде күзләргә яшь китергән клипның кечкенә герое Раязга килгәндә, ул балалар бакчасына гына йөри әлегә. Үзен "йолдыз" дип саный. Әмма йолдызлык чире белән авыртмый. Әйт кенә, күңелеңә ошаган теләсә-нинди җырны җырлап бирә ала. Үзенчәлекле бала. Тиз отып алучан. "Уф алла арбасы"нда да чын күз яшьләре белән, ышандырырлык итеп рольгә кереп, арба этә бит ул. Ә җырлавы... Клипның операторы Илдар Муллин кинога төшерү өчен бер атнага Казанга да алып китмәкче булган үзен. Тик әтисенең вакыты булмау сәбәпле туктап калганнар. Әтнә районы буенча уздырылган "Бирегез мәйдан", "Созвездие-Йолдызлык 2013"ның икенче туры дипломанты. "Мәңгәр" күмәк хуҗалыгы призына узган көрәш ярышында "Иң яшь көрәшче" исеменә лаек булган. Юкка гына безнең татар халкында "Атадан бала туар, атасының юлын куар", - дип әйтмиләр. Балаларны тәрбияләү белән күбрәк әниләре шөгыльләнсә дә, әти "сүзе" беренче урында бу гаиләдә. Монысы Рәзинәнең әни буларак зур тырышлыгы нәтиҗәсе. Бертуган Сәләхетдиновлар турында без әле алда да күп ишетербез. Тик югалтмаска иде аларны. Үзебезнекеләр бит.
Иң мөһим һәм кызыклы язмаларны Татмедиа Telegram-каналында укыгыз
