Нәтиҗәле инструмент

19 ноябрь көнне Татарстан Республикасының 43 муниципаль районындагы 852 авыл һәм 20 шәһәрендә гражданнар өчен үзара салым буенча референдумнар узды.
Әлеге Программа Татарстан Республикасы Президенты Рөстәм Миңнеханов ярдәмендә, 2013 елдан бирле тормышка ашырыла. Бу вакыт эчендә ул халыкның гражданлык активлыгын, урыннарда тормыш дәрәҗәсен күтәрү буенча нәтиҗәле инструментларның берсенә әйләнде. Узган елларда үзара салым тәртибендә, 1 сумга 4 сум республика субсидиясен дә исәпкә алып, территорияләрне үстерүгә 2,8 миллиард сумнан артык акча кертелгән. Бу суммалар исәбенә җирлекләрнең бик мөһим проблемалары уңай хәл ителә.
Агымдагы елның ав­гус­­тында Киров шә­һә­­рендә узган Россия Прези­денты каршындагы Совет утырышында Рос­сия Президенты Влади­мир Путин Татарстанның җирле референдумнар уздыру һәм гражданнарга үзара салым оештыру тәҗрибәсен ил­дә иң алдынгыларның бер­се дип атады, аны башка төбәкләрдә дә таратырга тәкъдим итте.
Районга килсәк, референдум барлык авыл җирлекләрендә дә узды. Анда тиешлегә карата 83.56% сайлаучы катнаш­ты.
"Үзебез өчен..."
Каенсар авылында урнашкан 1003нче сайлау участогына халык су ташкыны кебек агылмаса да, килүчеләрдән һич өзелеп тормады.
Аеруча иртәнге 8 белән 9 арасында кеше күп булды. Бу аңлашыла да, авыл кешесе иртән үк йокыдан тора да, кичтән планлаштырганны эшли башлый. Ә аңа кадәр референдумда катнашып, үз фикерен белдерә.
- Бик мөһим референ­дум бу - үзебез өчен, ки­ләчәгебез өчен. Хөкүмәт тә акчалата ярдәм иткәндә, мөмкинлектән файдаланып калырга кирәк, - диделәр бер төркем сайлаучылар үз фикерләрен белдерүне сорашкач. Сайлау участогы эшли башлауга иң беренче булып Каенсар авылында яшәүче Сөембикә Мәгъсүмҗанова кил­­гән. Сүз уңаеннан, га­зе­табызның актив хә­бәр­чесе дә әле ул. Шулай да иртән күрше-тирә авылларда яшәүчеләр арасыннан референдумга килүчеләр күбрәк иде.
- Әйшияз, Казак Үр­тә­мен­нән килүчеләр күп булды. Хәзер бит ике йортның берсендә автомо­биль бар, - диделәр биредә. Шул сәбәп­леме, иртәнге 9.00гә 30 % сайлаучы тавыш бирергә өлгерде. Ә сайлаучыларның фикере бердәй яңгырый: "Үзебез өчен кирәк", - диләр.