Олимпиаданың бер көне

Бездә, Рәсәй данын якларга дип, НХЛдан кайткан Овечкин, Малкин, Дацюк һәм башка бик күп уенчылар, шул исәптән Америка төрмәсенә эләгүдән могҗиза белән котылып кайткан капкачы Варламов та бар. Менә ул инде янкиларга ачу итеп, үз капкасына бер шайба да керттермәячәк! Овечкин, Малкиннарның да хәзерлекләре шәптер, начар булса Рәсәй телевидениесендә реклама ясап вакыт үткәреп йөрмәсләр иде. Хәлиткеч моментта безнең җыелма команданы шайба кертеп коткаручы Ковальчук, "Иван Васильевич меняет профессию" фильмындагы патшага охшаган, "әтәчлеге", тәвәкәллеге өчен "Иван Грозный" кушаматы алган Александр Радулов һәм башка бик күп хоккей йолдызларыбыз да бар бит әле. Шундый уенчыларыбыз барында без янкиларны җиңәбез дә җиңәбез. Кызларыбыз да кеп-кечкенә Швейцария кызларын "өреп" кенә ыргытырлар. Шундый уйлар белән көне буе хыял диңгезендә йөздем. Минем бу халәтемне конькида, чаңгыда шуучыларыбызның медальсез калулары да, җыелма командабызның күп кенә бәләкәй илләрдән дә калышып, гомуми зачетта җиденче генә булулары да боза алмады.
Хоккей башланганда йөрәгем ике мәртәбә зуррак тизлек белән тибә иде. Америкалыларга буллитлар буенча оттыргач, кызларыбыз Швейцария кызлары тарафыннан тар-мар ителгәч, ул бөтенләй туктап кала язды. Ярый әле өйдә валидол бар. Әниләрнең он или торган җилпучына охшаган чанада ("скелетон" диләр бугай) безнең Третьяковның алтын медаль алу хәбәре генә күңелдәге кара болытларны бераз таратып җибәрде. Безнең спорт комментаторлары әйтмешли, зур җиңүләр алда әле дип, үземне юатып, саташып төн уздырдым.

Реклама